जगदीश खरेलको ‘तमासा’ टिप्पणीले संसद ततायो, नेकपाद्वारा रेकर्डबाट हटाउन माग

काठमाडौं । प्रतिनिधिसभा बैठकमा राष्ट्रिय स्वतन्त्र पार्टी (रास्वपा)का सांसद जगदीश खरेलले विपक्षी दलको विरोधलाई ‘तमासा’ भनेर टिप्पणी गरेपछि संसदमा विवाद उत्पन्न भएको छ ।

उक्त अभिव्यक्तिप्रति आपत्ति जनाउँदै नेपाली कम्युनिस्ट पार्टी (नेकपा)का सांसद रमेश मल्लले नियमापत्ति गरेका छन् । प्रतिनिधिसभा बैठकमा विपक्षी दलहरूले निरन्तर नाराबाजी र विरोध गरिरहेकै अवस्थामा सभामुख डोलप्रसाद अर्यालले बैठक अगाडि बढाएका थिए ।

Advertisement

सोही क्रममा पर्यटन विधेयक, २०८२ माथि विचार गरियोस् भन्ने प्रस्तावमाथि छलफल सुरु गरिएको थियो । विधेयकमाथि धारणा राख्न रोष्ट्रममा पुगेका सांसद खरेलले विपक्षीहरूको विरोधलाई लक्षित गर्दै ‘तमासा’ शब्द प्रयोग गरेका थिए । उनको उक्त अभिव्यक्तिपछि संसद बैठकमा केहीबेर तनावपूर्ण अवस्था बनेको थियो ।

त्यसपछि नेकपाका सांसद मल्लले तत्काल उठेर नियमापत्ति गर्दै ‘तमासा’ शब्द असंसदीय र अपमानजनक भएको दाबी गरे । उनले यस्तो अभिव्यक्ति संसदको मर्यादाविपरीत रहेको भन्दै संसदको आधिकारिक रेकर्डबाट हटाउन सभामुखसमक्ष माग गरेका थिए ।

सांसद मल्लले प्रतिपक्षी दलको विरोधलाई अवमूल्यन गर्ने गरी प्रयोग गरिएको शब्दले संसदीय अभ्यास र लोकतान्त्रिक संस्कृतिमाथि नै प्रश्न उठाएको टिप्पणी गरेका थिए । उनले विरोध गर्ने अधिकारलाई सम्मान गर्नुपर्ने उल्लेख गर्दै संसदभित्र प्रयोग हुने भाषामा संयमता आवश्यक रहेको बताए ।

विपक्षी दलको अवरोधकै बीच सभामुखले बैठक अगाडि बढाएपछि सत्ता र प्रतिपक्षबीचको तनाव झन् बढेको देखिएको थियो । पछिल्लो समय संसदमा प्रयोग हुने शब्द र अभिव्यक्तिलाई लिएर बारम्बार विवाद सिर्जना हुँदै आएको छ ।