विद्या भण्डारी ३७ सालकै सदस्य हो: अध्यक्ष ओली

काठमाडौं । नेकपा एमालेका अध्यक्ष केपी शर्मा ओलीले पूर्वराष्ट्रपति विद्यादेवी भण्डारीको पार्टी सदस्यतालाई लिएर भइरहेका विभिन्न टीकाटिप्पणीबारे प्रस्ट पारेका छन् ।

एमालेको ‘सदस्यता नवीकरण तथा विस्तार उत्प्रेरणा’ सम्बन्धी राष्ट्रिय कार्यशालालाई सम्बोधन गर्दै ओलीले भण्डारीले विधिवत् रूपमा आवेदन दिएपछि मात्रै पार्टीले सदस्यता दिएको स्पष्ट पारेका हुन् ।

Advertisement

अध्यक्ष ओलीले भण्डारी २०३७ सालदेखि नै एमालेको संगठित सदस्य रहेको र २०३४ सालदेखि नै कम्युनिस्ट आन्दोलनमा सक्रिय रहेको स्मरण गराए । उनले राष्ट्रपति जस्तो गरिमामय पदमा रहँदा पदीय मर्यादाका कारण उनको सदस्यता निष्क्रिय रहेको तर अहिले प्रक्रिया पुर्‍याएर पुनः सक्रिय गराइएको बताए ।

‘विद्या भण्डारीजीको कुरा अहिले पनि चर्चामा छ । उहाँ राष्ट्रपति भएको बेला सदस्य हुनुहुन्न थियो, त्यसैले नवीकरण हुने कुरा भएन,’ ओलीले भने, ‘हाम्रो केन्द्रीय कमिटीले एउटा आवेदन दिनुस् भनेपछि उहाँले आवेदन दिनुभयो र कमिटीले सदस्यता दियो । उहाँ ३७ सालकै सदस्य हो, यसमा कुनै भ्रम राख्नु पर्दैन ।’
भण्डारीको सक्रियतालाई लिएर पार्टीभित्र र बाहिर हुने गरेका चर्चालाई लक्षित गर्दै ओलीले यसलाई ‘हारजित’ को विषय नबनाउन आग्रह गरे । उनले भने, ‘यो कसैको हार वा जितको प्रश्नै होइन । हरेक कुरामा खोचे थाप्ने र निहुँ खोज्ने काम कसैले गर्नु हुँदैन । हामी संगठनको विधि र प्रक्रिया अनुसार चल्नुपर्छ ।’

कार्यकर्ताहरूलाई उच्च मनोबलका साथ संगठन विस्तारमा लाग्न निर्देशन दिँदै ओलीले पार्टीको विधान र पद्धतिलाई सबैले पालना गर्नुपर्नेमा जोड दिए । पूर्वराष्ट्रपति भण्डारीको पुनरागमनलाई एमालेभित्र एउटा स्वाभाविक प्रक्रियाको रूपमा लिनुपर्ने उनको आशय थियो ।