‘सीमा विवाद कूटनीतिक माध्यमबाटै समाधान हुन्छ, बेलायतको मध्यस्थता खोजेका होइनौं’

काठमाडौं । परराष्ट्रमन्त्री शिशिर खनालले नेपाल–भारत सीमा विवाद आपसी संवाद र कूटनीतिक माध्यमबाट समाधान गरिने बताएका छन् ।

भारत भ्रमण सकेर स्वदेश फर्किने क्रममा दिल्लीस्थित नेपाली दूतावासमा आइतबार बिहान आयोजित पत्रकार भेटघाटमा उनले बेलायतको मध्यस्थता खोजिएको भन्ने आशय गलत भएको स्पष्ट पारेका हुन् । भारतीय सञ्चारमाध्यमका पत्रकारहरूले प्रधानमन्त्री बालेन शाह (बालेन्द्र)को अभिव्यक्तिलाई लिएर उठाएका प्रश्नमा मन्त्री खनालले नेपालले सीमा विवादबारे विगतदेखि नै भारत र चीन दुवैलाई कूटनीतिक नोटमार्फत आफ्नो धारणा जानकारी गराउँदै आएको बताए ।

Advertisement

लिपुलेक र कालापानी क्षेत्र नेपालको भूमि भएकाले नेपालको सहमतिबिना भारत र चीनबीच कुनै सम्झौता हुन नसक्ने उनको भनाइ थियो । उनले प्रधानमन्त्री शाहले बेलायतको नाम उल्लेख गर्नुको उद्देश्य मध्यस्थता खोज्नु नभई ऐतिहासिक दस्तावेज र प्रमाणहरूको खोजी मात्र रहेको स्पष्ट पारे । सुगौली सन्धिसँग सम्बन्धित कागजात बेलायतका पुस्तकालय वा संग्रहालयमा हुन सक्ने भएकाले त्यसको अध्ययन आवश्यक रहेको उनले बताए ।

प्रबुद्ध व्यक्ति समूह (ईपीजी)को प्रतिवेदनबारे बोल्दै मन्त्री खनालले उक्त प्रतिवेदन नेपाल र भारतका प्रधानमन्त्रीहरूलाई बुझाउने सहमतिअनुसार तयार भएको भन्दै दुवै पक्षको सहमतिबिना सार्वजनिक गर्न नमिल्ने बताए । भारतीय विदेशमन्त्री एस जयशंकरसँगको भेटमा द्विपक्षीय सम्बन्धका समग्र विषयमा छलफल भएको उनले जानकारी दिए ।

उनले नेपाल ऐतिहासिक रूपमा दुई ठूला छिमेकीबीच ‘पुल’को भूमिकामा रहेको उल्लेख गर्दै आगामी दिनमा पनि सन्तुलित कूटनीतिक सम्बन्धलाई प्राथमिकता दिइने बताए ।