उपराष्ट्रपति यादव र प्रदेश प्रमुख खापुङबीच भेटवार्ता

काठमाडौं । उपराष्ट्रपति रामसहाय प्रसाद यादव र कोशी प्रदेशका प्रदेश प्रमुख परशुराम खापुङबीच शिष्टाचार भेटवार्ता भएको छ । लैनचौरस्थित उपराष्ट्रपतिको कार्यालयमा भएको उक्त भेटमा संवैधानिक जिम्मेवारी र संघीयता कार्यान्वयनका विविध पक्षमा छलफल भएको हो ।

भेटका क्रममा उपराष्ट्रपति यादव र प्रदेश प्रमुख खापुङबीच नेपालको संविधानले निर्दिष्ट गरेका कर्तव्यहरू, संघीयताको प्रभावकारी सुदृढीकरण तथा संघ र प्रदेशबीचको प्रशासनिक एवं राजनीतिक समन्वयका विषयमा गहन विचार विमर्श भएको थियो ।

Advertisement

सो अवसरमा उपराष्ट्रपति यादवले संघीय लोकतान्त्रिक गणतन्त्रात्मक व्यवस्थाको सफल कार्यान्वयनका लागि संघ र प्रदेशबीचको सहकार्यलाई अझ मजबुत बनाउनुपर्नेमा जोड दिए । उनले संविधानको मर्मअनुसार अघि बढ्न सके मात्र संघीयताको जग बलियो हुने र विकासको फल आम नागरिकसम्म पुग्ने उल्लेख गरे ।

कोशी प्रदेशका प्रदेश प्रमुख खापुङले संघीयता कार्यान्वयनमा प्रदेश तहबाट भइरहेका प्रयास र प्रतिबद्धताका बारेमा उपराष्ट्रपतिलाई अवगत गराए । उनले राष्ट्रिय एकता, समावेशिता र संवैधानिक प्रावधानअनुसार प्रदेश सरकारले निर्वाह गरिरहेको भूमिकाका बारेमा समेत जानकारी दिए ।

भेटमा दुवै पदाधिकारीहरूले मुलुकको वर्तमान अवस्था र संघीयतालाई जनमुखी बनाउने विषयमा साझा धारणा व्यक्त गरे ।