एकताबद्ध नभए काँग्रेसले लज्जास्पद हार बेहोर्नुपर्छ: रामहरि खतिवडा 

विराटनगर । नेपाली काँग्रेस नेता रामहरि खतिवडाले पार्टीभित्रको आन्तरिक कलह र गुटबन्दी अन्त्य नभए आगामी निर्वाचनमा काँग्रेसले देशभर लज्जास्पद हार बेहोर्नुपर्ने बताएका छन् । विराटनगरमा आयोजित इतर पक्षको भेलालाई सम्बोधन गर्दै उनले पार्टीलाई एकताबद्ध बनाएर लैजान नेतृत्वलाई आग्रह गरे ।

नेता खतिवडाले अहिलेको समयमा सबै प्रजातन्त्रवादी शक्तिहरू एउटै छातामुनि गोलबन्द हुनुपर्नेमा काँग्रेसभित्रै एकले अर्कालाई अपमान गर्ने र सामाजिक सञ्जालमा गालीगलौज गर्ने प्रवृत्ति बढेको बताए । ‘एउटा काँग्रेसले अर्को काँग्रेसलाई गाली गर्ने र सामाजिक सञ्जालमा खुइल्याउने पद्धतिले काँग्रेस मात्र होइन, देशको प्रजातन्त्र, राष्ट्रियता र कानुनी राज्यसमेत कमजोर भएको छ,’ उनले भने ।

Advertisement

पार्टीभित्र पुस्तान्तरणको बहस चलिरहेका बेला नेता खतिवडाले पुरानो र नयाँ पुस्ताबीच समन्वय हुनुपर्नेमा जोड दिए । पुरानो पुस्ताले ‘सबास काँग्रेस’ र नयाँ पुस्ताले ‘क्याबात काँग्रेस’ भन्न सक्ने वातावरण निर्माण हुनुपर्छ । काँग्रेसलाई अगाडि बढाउन एकताको विकल्प छैन, उनले भने।

आगामी १५ औँ महाधिवेशनमा सबै पक्षलाई समेटेर अगाडि बढ्न नेतृत्वलाई आग्रह गरे । ‘यदि १५ औँ महाधिवेशनमा हामी एकताबद्ध भएर जान सकेनौँ भने ७७ वटै जिल्लाका स्थानीय र प्रदेश तहमा काँग्रेसले अझ लज्जास्पद हार बेहोर्नुपर्ने सम्भावना छ,’ उनले थपे ।