सक्रिय राजनीतिबाट बिदा भए कृष्णबहादुर महरा

काठमाडौं । पटक पटक विवादमा तानिएका नेकपा नेता एवं पूर्वसभामुख कृष्णबहादुर महराले सक्रिय जिम्मेवारीबाट अलग भकाे घाेषणा गरेका छन् । उनले पार्टीकाे साधारण सदस्यका रूपमा रहने घोषणा गरेका हुन् ।

आफू केही वर्षयता एट्रोफी सम्बन्धी रोगबाट पीडित रहेको जानकारी दिँदै उनले नसाहरू र मांसपेशीहरू क्रमशः खुम्चिँदै जाने समस्याका कारण नियमित उपचार, थेरापी तथा औषधि सेवन गरिरहेकाे बताए ।

Advertisement

स्वास्थ्य अवस्थाका कारण पार्टीका गतिविधि र जिम्मेवारीमा विगत झैँ सक्रिय तथा प्रभावकारी भूमिका निर्वाह गर्न कठिन भएको उनको भनाइ छ ।

बिहीबार जारी वक्तव्यमा महराले ४८ वर्षदेखि नेपाली कम्युनिस्ट आन्दोलनका विभिन्न चरण, संघर्ष र परिवर्तनका यात्रामा निरन्तर सहभागी हुँदै आएको उल्लेख गर्दै आफ्नो जीवनको महत्वपूर्ण समय पार्टी, आन्दोलन, देश र जनताको सेवामा समर्पित गरेको उल्लेख गरेका छन् ।

उनले यो निर्णय कुनै असन्तुष्टि, गुनासो वा वैचारिक विचलनका कारण नभई स्वास्थ्य अवस्थाले सिर्जना गरेको बाध्यात्मक परिस्थितिको परिणाम भएको उल्लेख गरेका छन् ।