राप्रपाको महाधिवेशन आगामी मंसिर २६ देखि २८ सम्म काठमाडौंमा हुने

काठमाडौं । राष्ट्रिय प्रजातन्त्र पार्टी (राप्रपा) ले आफ्नो आगामी महाधिवेशनको मिति तय गर्दै कार्य तालिका अनुमोदन गरेको छ । बिहीबार धुम्बाराहीस्थित पार्टी केन्द्रीय कार्यालयमा बसेको केन्द्रीय कार्यसम्पादन समितिको बैठकले आगामी मंसिर २६, २७ र २८ गते काठमाडौंमा महाधिवेशन आयोजना गर्ने निर्णय गरेको हो ।

बैठकले निर्वाचन समितिले तयार पारेको निर्वाचन नियमावली र निर्देशिकालाई आवश्यक परिमार्जनसहित स्वीकृत गरेको छ । पार्टी अध्यक्ष राजेन्द्र लिङ्देनले महाधिवेशनलाई व्यवस्थित बनाउन र आन्तरिक निर्वाचन प्रक्रियालाई चुस्त राख्न परिमार्जित नियमावलीले सहयोग पुर्‍याउने विश्वास व्यक्त गरे ।

Advertisement

अध्यक्ष लिङ्देनका अनुसार कार्यसम्पादन समितिबाट पारित भएका यी प्रस्तावहरू शुक्रबारदेखि सुरु हुने केन्द्रीय समितिको बैठकमा पेस गरिनेछ । ‘केन्द्रीय कार्यसम्पादन समितिले पारित गरेको महाधिवेशनको कार्य तालिका र निर्देशिकामाथि शुक्रबारको केन्द्रीय समिति बैठकमा विस्तृत छलफल हुनेछ,’ अध्यक्ष लिङ्देनले भने ।
केन्द्रीय समितिले ती प्रस्तावहरूमाथि छलफल गरी आवश्यक निर्णय लिएपछि महाधिवेशनको तयारीलाई थप तीव्रता दिइने राप्रपाले जनाएको छ । निर्वाचनको तयारी र संगठन सुदृढीकरणका लागि राप्रपाले यसअघि नै विभिन्न चरणमा छलफल गर्दै आएको थियो।