आपराधिक पृष्ठभूमिका अभिषेक गिरी : व्यवसायीको जग्गा हडप्दै, श्रीमतीको नाममा राख्दै

विराटनगर । विराटनगर महानगरपालिका–८ घर भएका आपराधिक पृष्ठभूमिका ‘गुन्डानाइके’ अभिषेक गिरीले निर्माण व्यवसायीलाई विश्वासमा पारेर करोडौं रुपैयाँ बराबरको सम्पत्ति हडपेको खुलासा भएको छ ।

सरकारी ठेक्का मिलाइदिने भन्दै निर्माण व्यवसायीलाई विश्वासमा पारेर सम्पत्ति हडपेको आरोप लागेका गिरी अहिले नेपाल प्रहरीको केन्द्रीय अनुसन्धान ब्यूरो (सीआईबी)को नियन्त्रणमा छन् । उनीमाथि सीआईबीले गहिरो अनुसन्धान गरिरहेको छ । हालसम्मको अनुसन्धानका क्रममा गिरीले विभिन्न ठाउँका जग्गा हडपेर श्रीमती सोनु आचार्यको नामम राखेको पत्ता लागेको छ । सोनुको नाममा पछिल्ला दुई वर्षभित्र काठमाडौं, मोरङ र धनकुटासहित विभिन्न स्थानमा ठूलो मात्रामा जग्गा खरिद गरिएको पनि फेला परेको छ ।

Advertisement

जग्गा खरिद, त्यसको स्रोत लगायतका विवरण प्रहरीले केलाइरहेको छ । सीआईबीले काठमाडौं जिल्ला अदालतबाट गिरीविरुद्ध पक्राउ पुर्जी जारी गराएको थियो । त्यही पक्राउ पुर्जीका आधारमा प्रहरीले उनलाई सोमबार राति काठमाडौं लगेर विस्तृतमा अनुसन्धान गरिरहेको छ ।

मोरङ कारागारका कैदीबन्दीलाई वितरण गरिएको भत्ता असुलेको पत्ता लागेपछि असार १३ गते बिहान गिरी पक्राउ परेका थिए । उनीविरुद्ध मोरङ प्रहरीले आपराधिक विश्वासघातको कसुरमा अनुसन्धान गरिरहेको थियो । तर, असार १७ गते उच्च अदालत विराटनगरले उनीमाथिको अनुसन्धान ५ दिनभित्रमा सक्न प्रहरीका नाममा निर्देशनात्मक आदेश जारी गरेको थियो ।

प्रहरीले भने गिरीलाई संगठिग अपराध र सम्पत्ति शुद्धीकरण मुद्दामा अनुसन्धानका लागि मोरङ अदालतसँग म्याद मागेको थियो । तर, मोरङ जिल्ला अदालतले गिरीलाई थुनामा राख्ने म्याद दिन अस्वीकार गर्दै उच्चकै आदेश अनुसार गर्नुपर्ने निर्णय सुनायो । जिल्ला अदालतको आदेशबाट थुनामुक्त हुनेबित्तिकै सीआईबीको टोलीले उनलाई सोमबार राति नियन्त्रणमा लिएको थियो । त्यसपछि काठमाडौं जिल्ला अदालतले थप अनुसन्धानका लागि तीन दिन हिरासतमा राख्न सीआईबीलाई अनुमति दिएको छ ।

प्रहरीका अनुसार हेटौंडास्थित श्रेष्ठ कन्ट्रक्सनका सञ्चालक सुभाष श्रेष्ठले दिएको जाहेरीका आधारमा अनुसन्धान सुरु गरिएको छ । श्रेष्ठले दिएको जाहेरीमा गिरीले आफूलाई प्रभावशाली राजनीतिक नेतृत्वसँग निकट सम्बन्ध भएको व्यक्ति भन्दै हुलाकी सडकअन्तर्गत मोरङको कटहरी–हाटखोला खण्डसहित अन्य सरकारी आयोजना मिलाइदिने आश्वासन दिएको उल्लेख छ । यही विश्वासका आधारमा आफूलाई आर्थिक र व्यावसायिक रूपमा गिरीले ठूलो क्षति पुर्‍याएको श्रेष्ठको दाबी छ ।

गिरीले श्रेष्ठको स्वामित्वमा रहेका एउटा एक्साभेटर र तीनवटा टिपर सम्बन्धित धनीलाई जानकारी नै नदिई कवाडीमा बिक्री गरेको जाहेरीमा उल्लेख छ । त्यस्तै, अन्य निर्माण उपकरण धम्की दिएर आफ्नो नियन्त्रणमा राखेको, खाली चेकमा हस्ताक्षर गर्न बाध्य बनाएको तथा त्यही चेक प्रयोग गरेर उल्टै कानुनी प्रक्रिया अघि बढाएको आरोप पनि श्रेष्ठले लगाएका छन् ।

श्रेष्ठका अनुसार गिरीले करिब पाँच करोड ४५ लाख रुपैयाँ बराबरको चेक बाउन्स गराएका छन् । थप ५० लाख रुपैयाँ जबर्जस्ती असुलेर लगेका थिए । गिरीमाथिको आरोपका बारेमा प्रहरीले विस्तृतमा अनुसन्धान गरिरहेको छ ।

चार करोड रूपैयाँभन्दा बढी मूल्य पर्ने काठमाडौं महानगरपालिका–बुढानीलकण्ठ–७ स्थित २१७.०१ वर्गमिटर क्षेत्रफलको घरजग्गा परिवारलाई ज्यान मार्ने धम्की दिँदै १८ लाख रुपैयाँमा गिरीले श्रीमती सोनु आचार्यको नाममा पास गराएको जाहेरीमा उल्लेख छ । मालपोत अभिलेखअनुसार उक्त घरजग्गा २०८२ साल कार्तिक २८ गते आचार्यको नाममा दर्ता भएको देखिएको प्रहरीले जनाएको छ ।

सीआईबीले संकलन गरेको प्रारम्भिक विवरणअनुसार २०८० देखि २०८२ सालको अवधिमा सोनु आचार्यको नाममा विभिन्न स्थानमा करोडौं मूल्य बराबरको जग्गा खरिद तथा नामसारी गरिएको देखिन्छ । तीमध्ये मोरङको कटहरी गाउँपालिका–४ मा १,८२२.३७ वर्गमिटर, बबियाविर्तामा ४,६५५.५२ वर्गमिटरसहित थप चार कित्ता, विराटनगर महानगरपालिका–६ मा ३३६.६३ वर्गमिटर तथा धनकुटा नगरपालिका–५ मा ५६२.४० वर्गमिटर व्यावसायिक जग्गा रहेको प्रहरीले जनाएको छ ।

केही जग्गा बैंकको लिलामी प्रक्रियामार्फत नामसारी भएको देखिए पनि सम्पत्तिको स्रोत र आर्थिक आधारका बारेमा विस्तृत अनुसन्धान भइरहेको सीआईबीका प्रवक्ता एवं एसएसपी अनुप शम्शेर जबराले बताए । यससँगै मोरङ प्रहरीले पनि गिरी परिवारसँग सम्बन्धित सम्पत्तिको स्रोतबारे छुट्टै अनुसन्धान अघि बढाएको छ ।

एसएसपी जबराका अनुसार प्रारम्भिक अनुसन्धानमा गिरीले आपराधिक विश्वासघात गरेर अरुको सम्पत्ति हडपेको देखिन्छ । हाल गिरीमाथि ठगी, आपराधिक लाभ तथा सम्पत्ति शुद्धीकरणसम्बन्धी कसुरमा अनुसन्धान भइरहेको उनले बताए । अनुसन्धानका क्रममा प्राप्त हुने प्रमाणका आधारमा थप कानुनी प्रक्रिया अघि बढाइने प्रहरीले जनाएको छ ।

यसअघि पनि विभिन्न विवादमा नाम जोडिँदै आएका ४८ वर्षीय गिरीविरुद्धको पछिल्लो अनुसन्धानले उनको सम्पत्ति आर्जनको स्रोत, आर्थिक कारोबार तथा सम्पत्तिको वैधतामाथि थप प्रश्न उठाएको छ । यद्यपि, उनीमाथि लगाइएका आरोपहरू अदालतबाट अन्तिम रूपमा प्रमाणित भइसकेका छैनन् । अनुसन्धान प्रक्रिया जारी छ ।

गिरी लामो समयदेखि ठेक्कापट्टा तथा असुलीमा संलग्न विवादास्पद पात्र हुन् । यसअघि अपहरण तथा शरीर बन्धक मुद्दामा ९ वर्षभन्दा बढी कैद सजाय भुक्तान गरेर छुटेका उनले पुरानो धन्दालाई भने निरन्तरता दिइरहेको पाइएको छ । मोरङ कारागारमा चौकीदारको जिम्मेवारीमा रहँदा कैदीबन्दीलाई चरम यातना दिएर पैसा असुलेका गिरीले जेलबाट छुटेर पनि कारागारमा आफ्नो प्रभाव कायमै राखेको प्रहरीले जनाएको छ ।

उनीमाथि लामो समयदेखि ‘मिटरब्याज’को धन्दासमेत चलाइरहेको आरोप लागेको छ । विराटनगरका उद्योगी, व्यवसायीदेखि सर्वसाधारणसम्मलाई डर, त्रास देखाउँदै धम्की दिएर असुली धन्दामा संलग्न रहेको पाइएको जानकारी प्रहरीले दिएको छ ।