सामाजिक सद्भाव र कानुनी शासनका लागि विद्यार्थीको भूमिका महत्त्वपूर्ण: मन्त्री पराजुली

विराटनगर । कोशी प्रदेशका आन्तरिक मामिला तथा कानुन मन्त्री इन्द्रमणि पराजुलीले सामाजिक सद्भाव, राष्ट्रिय एकता र कानुनी शासनलाई बलियो बनाउन कानुनका विद्यार्थीहरूले नेतृत्वदायी भूमिका खेल्नुपर्ने बताएका छन् ।

शनिबार विराटनगरस्थित डिग्री क्याम्पसमा आयोजित एलएलबी कार्यक्रमको अभिमुखीकरण कार्यक्रमलाई सम्बोधन गर्दै मन्त्री पराजुलीले सो कुरा बताएका हुन् । उनले संविधान र कानुनको प्रभावकारी कार्यान्वयनका लागि देशलाई सक्षम, जिम्मेवार र नैतिकवान् कानुनी जनशक्ति आवश्यक रहेकोमा जोड दिए ।

Advertisement

‘नेपाल वीर पुर्खाहरूको त्यागले जोगिएको गौरवपूर्ण इतिहास बोकेको राष्ट्र हो,’ मन्त्री पराजुलीले भने, ‘अहिले समाजमा देखिएका चुनौतीहरूलाई हामीले आपसी एकता र सहकार्यबाटै समाधान गर्नुपर्छ ।’ पछिल्लो समय सामाजिक सद्भावमा असर पुग्ने खालका गतिविधि देखिन थालेकोमा चिन्ता व्यक्त गर्दै उनले सबै नागरिकलाई सचेत रहन आग्रह गरे ।

नेपालको संविधानलाई नागरिक स्वतन्त्रता र मानव अधिकार सुनिश्चित गर्ने प्रगतिशील दस्ताबेजको रूपमा व्याख्या गर्दै मन्त्री पराजुलीले संघीयता कार्यान्वयनसँगै सुशासन र समृद्धिको आधार बलियो बन्दै गएको बताए । उनले भने, ‘कानुनको अध्ययन केवल जागिर खानका लागि मात्र नभई समाजमा न्याय र विधिको शासन स्थापित गर्ने एउटा पवित्र अभियान पनि हो ।’

यस वर्षदेखि डिग्री क्याम्पसमा सुरु भएको एलएलबी कार्यक्रममा ३ सय जना विद्यार्थी भर्ना भएका छन् । क्याम्पस प्रमुख ढकबहादुर मगरले साउन २५ गतेदेखि रात्रिकालीन सत्रमा कक्षा सञ्चालन हुने जानकारी दिए ।

कार्यक्रममा क्याम्पसका सहायक प्रमुख मिलन खरेल, प्रा.डा. शिवकुमार राई, कार्यक्रम संयोजक शान्तिराम भण्डारी, प्राध्यापक संघका सभापति राम पोखरेल, स्ववियू सभापति प्रितम साह लगायतले कानुन शिक्षाको महत्वबारे आआफ्नो धारणा राखेका थिए ।