एमाले नेताहरु काठमाडौंतिर, यता मुख्यमन्त्रीविरुद्ध हस्ताक्षर अभियान

मुलुकी खबर

२०८३ श्रावण १९, मंगलबार १४:३२

विराटनगर। कोशी प्रदेश सरकारको नेतृत्व परिवर्तनको विषयलाई लिएर नेकपा एमालेभित्रको आन्तरिक विवाद उत्कर्षमा पुगेको छ। मुख्यमन्त्री हिक्मतकुमार कार्कीले तत्काल पद छोड्न अस्वीकार गरेपछि पार्टी अध्यक्ष केपी शर्मा ओलीले समस्या सुल्झाउन कोशीका तीन शीर्ष नेतालाई काठमाडौं बोलाएका छन्।

अध्यक्ष ओलीले मुख्यमन्त्री कार्की, एमाले सचिव शेरधन राई र प्रदेश कमिटी अध्यक्ष घनश्याम खतिवडालाई छलफलका लागि गुण्डुस्थित आफ्नो निवास बोलाएका हुन्। यसअघि नै अध्यक्ष ओलीले मुख्यमन्त्री कार्कीलाई राजीनामा दिएर मार्गप्रशस्त गर्न निर्देशन दिएका थिए। सोही सन्देश लिएर सचिव राई शनिबार विराटनगर आइपुगेका थिए।

तर मुख्यमन्त्री कार्कीले व्यक्तिगत निर्देशनका भरमा राजीनामा नदिने अडान लिए। पार्टीको औपचारिक वा संस्थागत निर्णय आए मात्र पद छाड्ने कार्कीको अडानपछि अध्यक्ष ओली रुष्ट बनेका छन्।

यता, विराटनगरमा भने मुख्यमन्त्री कार्कीविरुद्ध हस्ताक्षर अभियान तीव्र पारिएको छ। ओलीले तिलकुमार मेन्याङ्बोलाई नयाँ मुख्यमन्त्रीका रूपमा अघि सार्न खोजेका छन्। मेन्याङ्बोलाई अघि बढाउन कार्कीलाई संसदीय दलको नेताबाट हटाउने तयारी भइरहेको छ।

यसका लागि सांसदहरूकै निवासमा पुगेर दुई वटा छुट्टाछुट्टै कागजमा हस्ताक्षर गराइएको स्रोतको दाबी छ। संसदीय दलको नेता परिवर्तन गर्ने र सरकारलाई दिएको समर्थनसमेत फिर्ता लिनेसम्मको तयारीका लागि यो कदम चालिएको बताइएको छ।

यसरी दबाबमूलक ढंगले सादा कागजमा हस्ताक्षर गराइएको भन्दै एमालेकै केही सांसदहरूले असन्तुष्टि जनाएका छन्। प्रदेश सांसद रेवतीरमण भण्डारीले मुख्यमन्त्री लचिलो हुँदाहुँदै यसरी हस्ताक्षर संकलन गरेर पार्टीभित्र अस्थिरता निम्त्याउन खोजिएको बताए। मुख्यमन्त्रीसँग अझै पनि वैधानिक रूपमा अघि बढ्ने धेरै विकल्प बाँकी रहेको र उनको एउटै निर्णयले यी हस्ताक्षर अर्थहीन बन्न सक्ने दाबी भण्डारीले गरे।