‘पार्टीलाई गतिशील बनाउन नेतृत्वले अविलम्ब निकास दिनुपर्छ’

Share this
723shares
मुलुकी खबर
मुलुकी खबर
clock२०८३ साउन २५, सोमबार १७:४३

काठमाडौं । नेपाली कांग्रेसका नेता मोहनबहादुर बस्नेतले पार्टीलाई थप सशक्त, गतिशील र प्रभावकारी बनाउन नेतृत्वले अविलम्ब निकास दिनुपर्ने बताएका छन्। नेपाली कांग्रेस सिन्धु–काठमाडौंद्वारा सोमबार आयोजित कार्यक्रममा बोल्दै उनले पार्टीभित्रको वर्तमान गतिरोध अन्त्यका लागि सभापति गगन थापालाई आगामी २८ गतेसम्मको समयसीमा दिइएको जानकारी दिए।

नेता बस्नेतले निर्धारित समयभित्र उपयुक्त निकास नआए २९ गतेदेखि पार्टीले नयाँ कार्यदिशा तय गर्ने चेतावनी दिए।मरणासन्न अवस्थामा पुगेको कांग्रेसलाई पुनर्जीवित गर्दै बलियो, जाँगरिलो र ठूलो पार्टी निर्माण गर्नु आजको आवश्यकता रहेको उनले बताए। मुलुकको भविष्य हाँक्न, सबै राजनीतिक शक्तिलाई एकताबद्ध बनाउन र बढ्दै गएको निरंकुश प्रवृत्तिलाई रोक्न सक्षम कांग्रेस निर्माण गर्नुपर्नेमा उनले जोड दिए। २८ गतेसम्म गगन थापाले निकास नदिए २९ गतेबाट पार्टीले नयाँ कार्यदिशा लिने उनको भनाइ थियो।

मुलुकमा बढ्दै गएको निरंकुशतालाई रोक्न र देशको भविष्य सुनिश्चित गर्न कांग्रेसलाई सबैभन्दा ठूलो र सुदृढ शक्तिको रूपमा स्थापित गर्नुको विकल्प नरहेको उनले स्पष्ट पारे।

काँग्रेस फुटाउन नभई अझ बलियो र एकताबद्ध बनाउन नेताहरू देशभर सक्रिय भइरहेको दाबी गर्दै उनले तोकिएको समयसम्म निकास ननिस्किए नयाँ बाटो रोज्नुपर्ने अवस्था आउन सक्ने बताए। देशभर चलिरहेको यस अभियानलाई आ-आफ्नो जिल्लामा युवाहरूले एकीकृत रूपमा अघि बढाउनु नै कार्यक्रमको मुख्य उद्देश्य रहेको उनले जानकारी दिए।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.