रास्वपाको केन्द्रीय समितिको बैठक बस्दै 

काठमाडौं । राष्ट्रिय स्वतन्त्र पार्टी (रास्वपा) को केन्द्रीय समिति बैठक शुक्रबार (आज) पार्टी केन्द्रीय कार्यालय बस्दै छ । सत्तारुढ दल रास्वपाको आज बिहान ११ बजे पार्टी केन्द्रीय कार्यालय वनस्थलीमा बैठक सुरु हुने महामन्त्री विपिनकुमार आचार्यले जानकारी दिएका छन् ।

बैठक स्थानीय निर्वाचनका लागि उम्मेदवार छनोट रूपरेखा २०८३ अनुमोदन गर्ने सम्बन्धमा, राइट टु रिकल सम्बन्धी दस्ताबेज निर्माण गर्ने सम्बन्धमा र सांगठनिक व्यवस्थापन तथा मनोनयन सम्बन्धी विषयमा छलफल हुने आचार्यले बताए ।

Advertisement

त्यस्तै केन्द्रीय समिति सदस्य मनोनयन सम्बन्धमा, पदाधिकारी मनोनयन सम्बन्धमा, सचिवालय सदस्य मनोनयन सम्बन्धमा, विभागीय प्रमुखहरूको मनोनयन सम्बन्धमा, र  स्थानीय निर्वाचनका लागि केन्द्रीय उम्मेदवार छनोट समिति सदस्य मनोनयन सम्बन्धमा पनि बैठकमा छलफल हुनेछ ।

केन्द्रीय समिति र प्रतिनिधि सभा सदस्य नेतृत्वमा स्थानीय तहमा उम्मेदवार छनोट रूपरेखा अभिमुखीकरण तथा प्रशिक्षण कार्यक्रम सञ्चालन सम्बन्धमा र पार्टीको मुखपत्रका रूपमा स्वतन्त्र मासिक डिजिटल पत्रिका प्रकाशन गर्ने सम्बन्धमा पनि बैठकले आवश्यक निर्णय लिने उनले बताए ।