विराटनगरको रानी अस्पतालमा अत्याधुनिक प्रयोगशाला सञ्चालन 

विराटनगर । विराटनगर महानगरपालिकाको स्वामित्वमा रहेको रानी अस्पतालमा सुविधा सम्पन्न प्रयोगशाला (ल्याब) सञ्चालनमा आएको छ । महानगरवासीलाई सहुलियत शुल्कमा गुणस्तरीय स्वास्थ्य सेवा उपलब्ध गराउने उद्देश्यले सोमबारदेखि प्रयोगशाला सेवा विधिवत् रूपमा सुरु गरिएको हो ।

प्रयोगशालाको उद्घाटन गर्दै विराटनगर महानगरपालिकाका प्रमुख नागेश कोइरालाले महानगरवासीलाई सस्तो शुल्कमा गुणस्तरीय स्वास्थ्य सेवा पुर्‍याउने प्रतिबद्धताअनुसार ल्याब सञ्चालनमा ल्याइएको बताए । ‘स्वास्थ्य सेवा महँगो हुँदा विपन्न र न्यून आय भएका परिवार बढी प्रभावित हुन्छन्,’ उनले भने, ‘महानगरकै अस्पतालबाट सस्तो र गुणस्तरीय सेवा दिएर नागरिकको उपचार खर्च घटाउनु हाम्रो मुख्य उद्देश्य हो ।’ उनले रानी अस्पताललाई दक्षिण क्षेत्रसहित समग्र विराटनगरकै भरपर्दो स्वास्थ्य केन्द्रका रूपमा विकास गरिने बताए ।

Advertisement

अस्पतालका प्रमुख माणिकचन्द भगतका अनुसार प्रयोगशालामा सुगर, थाइराइड, रगतको पूर्ण परीक्षण, कलेजो र मिर्गौलाको परीक्षण, मलेरिया, कालाज्वर लगायत ४० भन्दा बढी प्रकारका साधारण तथा विशिष्ट परीक्षणहरू हुनेछन् । अस्पतालमा स्वास्थ्य बिमा कार्यक्रमसमेत सञ्चालनमा रहेकाले बिमा गरेका सेवाग्राहीले ल्याबसहितका सेवाहरू निःशुल्क प्राप्त गर्न सक्ने स्वास्थ्य महाशाखा प्रमुख डा. दिलीपकुमार यादवले जानकारी दिए ।

विगतमा विकासका दृष्टिले पछि परेको दक्षिणी क्षेत्रलाई प्राथमिकतामा राखेर स्वास्थ्य सेवा विस्तार गरिएकोमा वडा नं १५ का अध्यक्ष प्रकाश साहले खुसी व्यक्त गरे । रानी अस्पतालले हाल २४ घण्टा प्रसूति सेवा (बर्थिङ सेन्टर), निःशुल्क फिजियोथेरापी, मुटुको ईसीजी, गर्भवतीका लागि निःशुल्क भिडियो एक्स–रे र पाठेघरको मुखको क्यान्सर परीक्षण जस्ता विशेष सेवाहरू पनि प्रदान गर्दै आएको छ ।