विराटनगरमा ऐतिहासिक रथयात्रा निकालिँदै

विराटनगर । विराटनगरमा आज (शनिबार) ५९औँ राधाकृष्ण रथयात्रा निकालिँदैछ । राधाकृष्ण मन्दिरबाट दिउँसो ३ बजे सुरु हुने रथयात्राको सम्पूर्ण तयारी पूरा भइसकेको छ ।

प्रत्येक वर्ष श्रीकृष्ण जन्माष्टमीको भोलिपल्ट निकालिने राधाकृष्ण रथयात्रामा नेपालका विभिन्न जिल्ला तथा छिमेकी भारतबाट समेत गरी पाँच लाखभन्दा बढी भक्तजन सहभागी हुने अनुमान गरिएको छ । ठूलो संख्यामा श्रद्धालु सहभागी हुने भएकाले रथयात्रालाई व्यवस्थित बनाउन आयोजक, स्वयंसेवक र सुरक्षा निकाय सक्रिय छन् ।

Advertisement

यसपटकको रथयात्रामा डीजे साउन्ड प्रयोग गर्न प्रतिबन्ध लगाइएको छ । धार्मिक पर्वको मौलिकता र आध्यात्मिक वातावरण कायम राख्न डीजेको सट्टा भजन–कीर्तन, धार्मिक झाँकी र परम्परागत प्रस्तुतिलाई प्राथमिकता दिइएको राधाकृष्ण मन्दिर व्यवस्थापन समितिका अध्यक्ष कैलाश रेग्मीले बताए ।

रथयात्राका क्रममा रथमा राखिएका दुईवटा हर्न माइकबाट भगवानका भजन बजाइनेछन् भने विभिन्न स्थानबाट स्थानीय भजन मण्डलीले भजन–कीर्तन प्रस्तुत गर्नेछन् । पछिल्लो समय धार्मिक पर्वमा चर्को डीजे साउन्डको प्रयोग बढ्दै गएपछि मौलिकता जोगाउन यसपटक यस्तो व्यवस्था गरिएको आयोजकको भनाइ छ ।

विराटनगरको राधाकृष्ण रथयात्राको इतिहास लामो छ । विसं १९८८ मा राधाकृष्ण मन्दिर स्थापना भएपछि खट यात्राबाट सुरु भएको धार्मिक परम्परा विक्रम संवत २०२५ देखि भव्य रथयात्राका रूपमा अघि बढेको हो । खट यात्राको हिसाबले यो ९५औँ यात्रा भए पनि रथयात्राको हिसाबले ५९औँ हो ।

राधाकृष्ण मन्दिरबाट सुरु हुने रथयात्रा तीनपैनी चोक, गोल्छा चोक, मेनरोड, ट्राफिक चोक, रोडशेष चोक र महेन्द्र चोक हुँदै कोशी राजमार्गतर्फ जानेछ । त्यसपछि बरगाछी हुँदै दुर्गा चोक पुगेर पुनः राधाकृष्ण मन्दिरमा फर्किनेछ । करिब ८ किलोमिटर दूरीको यात्रामा ४४ स्थानमा विश्रामको व्यवस्था गरिएको छ ।

यसपटक रथयात्राका क्रममा भेटीबापत संकलन हुने सम्पूर्ण रकम भोटेकोशी बाढीपीडितको राहतका लागि प्रयोग गरिने भएको छ । नगर परिक्रमा गराइने तीनवटा दानपेटिकाबाट संकलित रकम पनि भोटेकोशी बाढीपीडितका लागि प्रधानमन्त्री राहत कोषमा जम्मा गरिने आयोजकले जनाएको छ ।

रथयात्राको सुरक्षालाई लक्षित गरेर बिहानैदेखि ठूलो संख्यामा सुरक्षाकर्मी परिचालन गरिएको छ । भिडको अवस्थाका बारेमा निगरानी गर्न ड्रोनसमेत प्रयोग गरिने मोरङ प्रहरी प्रमुख एसपी कवित कटवालले बताए । उनले रथयात्राका क्रममा उच्छृङ्खल तथा आपराधिक गतिविधि गर्नेलाई तत्काल नियन्त्रणमा लिएर कारबाही गरिने जानकारी दिए ।

रथयात्रालाई व्यवस्थित बनाउन १ हजार १ सदस्यीय मूल समारोह समिति तथा २१ वटा उपसमिति गठन गरिएको छ । स्वास्थ्य, खानेपानी, सरसफाइ, विद्युत, स्वयंसेवक, झाँकी, सञ्चार तथा प्रचारप्रसारलगायतका व्यवस्थापनका लागि छुट्टाछुट्टै उपसमिति परिचालन गरिएको आयोजकले जनाएको छ ।

डीजे होइन, भजनले गुञ्जिँदैछ विराटनगर : यस्तो हुँदैछ ५९औँ राधाकृष्ण रथयात्रा