फ्रान्सेली विश्व च्याम्पियनलाई नकआउट गर्दै नेपाली बक्सरको ऐतिहासिक जित

काठमाडौं । नेपाली किक बक्सर अविरल घिमिरेले जापानमा आयोजित अन्तर्राष्ट्रिय किक बक्सिङ प्रतियोगितामा फ्रान्सका विश्व च्याम्पियन खेलाडीलाई नकआउट गर्दै उल्लेखनीय जित हासिल गरेका छन् ।

जापानको नागोया सहरस्थित करिया हलमा शनिबार साँझ सम्पन्न ‘हिट किक बक्सिङ–५९’ को मेन इभेन्टमा घिमिरेले फ्रान्सका माथन चोइनार्डलाई दोस्रो राउन्डमै नकआउट गरेका हुन् । चोइनार्ड सन् २०२५ का विश्व च्याम्पियन रहेको बताइएको छ ।

Advertisement

प्रतियोगिताको दोस्रो राउन्डको दोस्रो मिनेटमा घिमिरेले गरेको प्रहारपछि चोइनार्ड नकआउटमा परेका थिए । जितसँगै घिमिरेले अन्तर्राष्ट्रिय किक बक्सिङमा आफ्नो प्रभावलाई थप बलियो बनाएका छन् । घिमिरेले हालसम्म २९ अन्तर्राष्ट्रिय प्रतियोगितामा प्रतिस्पर्धा गरेको र २१ खेलमा जित हासिल गरेको जनाइएको छ । तीमध्ये २० खेल नकआउटमार्फत जितेको उनको दाबी छ ।

जितपछि घिमिरेले हालै रसुवाको भोटेकोशी क्षेत्रमा आएको बाढीबाट भएको जनधनको क्षतिप्रति दुःख व्यक्त गर्दै बाढीपीडितलाई सहयोग गर्ने बताएका छन् । उनले आफ्नो खेल यात्रामा साथ, सहयोग र हौसला प्रदान गर्ने सबैप्रति धन्यवादसमेत व्यक्त गरेका छन् ।