बाढी प्रभावितलाई धुलिखेल अस्पतालले एक वर्ष निःशुल्क उपचार गर्ने

काभ्रे । भोटेकोशी नदीमा भदौ १० गते आएको बाढीबाट प्रभावित परिवारका सदस्यलाई धुलिखेल अस्पतालले एक वर्षसम्म निःशुल्क स्वास्थ्य सेवा उपलब्ध गराउने भएको छ ।

अस्पतालले आज (आइतबार) विज्ञप्ति जारी गर्दै बाढीबाट प्रभावित परिवारले स्वास्थ्यसम्बन्धी समस्या र उपचारको आर्थिक भारसमेत व्यहोर्नुपर्ने अवस्थालाई मध्यनजर गर्दै परिवारका सदस्यलाई एक वर्षसम्म निःशुल्क उपचार सेवा दिने निर्णय गरेको जनाएको हो ।

Advertisement

अस्पतालका अनुसार यसबाट प्रभावित परिवारलाई स्वास्थ्य उपचारमा सहज पहुँच पुग्नुका साथै उपचारमा लाग्ने आर्थिक भार कम गर्न सहयोग पुग्नेछ । निःशुल्क स्वास्थ्य सेवा लिन आवश्यक प्रक्रिया, कागजात र अन्य विवरण छिट्टै सार्वजनिक गरिने अस्पतालले जनाएको छ ।

बाढीपछि प्रभावित समुदायमा विभिन्न स्वास्थ्य समस्या देखिन सक्ने अवस्थालाई ध्यानमा राख्दै अस्पतालले आफ्नो क्षमताअनुसार प्रभावित क्षेत्रमा स्वास्थ्यसम्बन्धी कार्यक्रम सञ्चालन तथा अन्य निकायसँग सहकार्य गर्ने तयारीसमेत गरेको छ ।

अस्पतालले बाढीबाट प्रभावित परिवारप्रति समवेदना व्यक्त गर्दै प्रभावित समुदायको स्वास्थ्य उपचार, पुनःस्थापना र पुनःनिर्माणका लागि निरन्तर साथ र सहयोग गर्ने प्रतिबद्धता जनाएको छ ।