साढे दुई करोडभन्दा बढीको सुनका गहनासहित महिला पक्राउ

भैरहवा। भारतबाट नेपालतर्फ सुनका गहना ल्याउँदै गरेको अवस्थामा सशस्त्र प्रहरीले आज (बिहीबार) एक महिलालाई पक्राउ गरेको छ। सिद्धार्थनगर-१ स्थित शान्ति गेटमा चेकजाँचका क्रममा काठमाडौं-१९ की ४६ वर्षीया ईला पटेललाई पक्राउ गरिएको हो।

सीमा सुरक्षा गुल्म डण्डाका सशस्त्र प्रहरी नायव उपरीक्षक गोपिकृष्ण भट्टराईको नेतृत्वमा खटिएको टोलीले शंका लागेर खानतलासी गर्दा पटेलको साथबाट करिब २ करोड ५१ लाख ९३ हजार ३ सय ५० रुपैयाँ बराबरको गहना बरामद भएको सशस्त्र प्रहरी नायव उपरीक्षक दुर्गा थापाले जानकारी दिए। उक्त सामग्री २ किलो ६ सय ५ ग्राम तौलको छ।

प्रहरीले जिल्ला सुनचाँदी व्यवसायी संघसँग समन्वय गरी परीक्षण गर्दा बरामद गरिएका सामग्रीमध्ये १ किलो सुन रहेको पुष्टि भएको छ। बरामद गरिएका गहनाहरूमा हार, औंठी, चुरा, सिक्री, झुम्का, ब्रासलेटलगायतका विभिन्न प्रकारका गरगहना रहेका छन्। पक्राउ परेकी महिला र बरामद गरिएका गहनालाई आवश्यक कारबाहीका लागि बिहीबार नै भैरहवा भन्सार कार्यालयमा बुझाइएको सशस्त्र प्रहरीले जनाएको छ।