गगनका पूर्वशिक्षक खड्गीले दिए कांग्रेस सभापतिमा उम्मेदवारी

काठमाडौं । नेपाली कांग्रेसको १५औँ महाधिवेशनमा सभापतिका लागि श्यामकृष्ण खड्गीले उम्मेदवारी दर्ता गराएका छन् । काठमाडौंका खड्गीले सभापति पदमा आफ्नो मनोनयन दर्ता गरेका हुन् ।

खड्गी करिब चार दशकदेखि कांग्रेस र नेपाल विद्यार्थी संघको राजनीतिमा सक्रिय छन् । कांग्रेसको वडा कार्यसमिति सदस्यदेखि क्षेत्रीय सभापतिसम्मको जिम्मेवारी सम्हालिसकेका उनले यसपटक पार्टीको सर्वोच्च नेतृत्वका लागि प्रतिस्पर्धा गर्न लागेका हुन् ।

रोचक पक्ष के छ भने, खड्गी शिक्षक रहँदा कांग्रेस सभापतिका अर्का दाबेदार गगन थापा उनका विद्यार्थी थिए । खड्गीले सिद्धार्थ वनस्थली स्कुलमा शिक्षकका रूपमा काम गरेका थिए ।

कांग्रेसमा सभापतिका लागि गगन थापाको सम्भावना बलियो मानिएको छ । तर, उनलाई सर्वसम्मत सभापति बन्न नदिने गरी खड्गीसहित पूर्वसहमहामन्त्री किशोरसिंह राठौरले पनि उम्मेदवारी दिने तयारी गरेका छन् ।

राठौर बर्दिया–२ बाट केन्द्रीय महाधिवेशन प्रतिनिधिमा निर्वाचित भएका थिए । यससँगै कांग्रेस महाधिवेशनमा सभापति पदको प्रतिस्पर्धा थप रोचक बन्ने देखिएको छ ।