संघले खुट्टा बाँधेर दौडिन भनिरहेको छ : मुख्यमन्त्री पाण्डे

विराटनगर । गण्डकी प्रदेशका मुख्यमन्त्री सुरेन्द्रराज पाण्डेले संघ सरकारले आवश्यक कानुन नबनाइदिँदा प्रदेश सरकारहरूले प्रभावकारी रूपमा काम गर्न नसकेको बताएका छन् । विराटनगरमा आयोजित मुख्यमन्त्री सम्मेलनमा बोल्दै उनले संघले प्रदेशको खुट्टा बाँधेर दौडिन भनेजस्तो व्यवहार गरिरहेको टिप्पणी गरे ।

‘हामीलाई दौडिन सकेन, दौडिन सकेन भनेर चौतर्फी भनिएको छ, तर हाम्रो खुट्टा बाँधिएको छ,’ पाण्डेले भने, ‘खुट्टा बाँधेर दौड भन्दा दौडिन नसक्नु स्वाभाविक हो । अनि उल्टै नाच्न जान्दैन, आँगन टेढो भनेजस्तै टिप्पणी सुन्नुपरेको छ ।’

उनले यसअघिका प्रधानमन्त्रीहरूले प्रदेशलाई बलियो बनाउने कानुन निर्माणमा गम्भीरता नदेखाएको आरोप लगाए । प्रधानमन्त्रीहरूसँगको छलफलमा प्रदेशका अधिकार र आवश्यक कानुनबारे कुरा उठाउँदा पनि व्यंग्यात्मक टिप्पणी सुन्नुपरेको अनुभव उनले सुनाए । वर्तमान प्रधानमन्त्रीसँग भने पर्याप्त छलफल गर्न नपाएको उनको भनाइ छ ।

संविधान जारी भएको ११ वर्ष पुग्न लाग्दासमेत राजनीतिक नेतृत्व र कर्मचारीतन्त्रमा केन्द्रीकृत मानसिकता कायम रहेको पाण्डेले बताए । ‘चाहे राजनीतिक पार्टीका नेताहरू हुन् या कर्मचारीतन्त्रको नेतृत्व, सबैमा पुरानै केन्द्रीकृत मानसिकता हाबी छ,’ उनले भने ।

संविधानअनुसार आवश्यक कानुन नबनाइए संघीयताको पुनर्विचार गर्नुपर्ने अवस्था आउन सक्ने उनको भनाइ थियो । केन्द्रीकृत मानसिकताकै कारण प्रदेशका लागि अत्यावश्यक कानुन निर्माण हुन नसकेको उनले बताए । संविधानसँग बाझिएका पुराना कानुन संशोधन वा खारेज गर्नुपर्ने भए पनि तिनै कानुन देखाएर प्रदेशलाई अधिकार प्रयोग गर्नबाट रोकिएको पाण्डेको आरोप छ ।

‘प्रहरी समायोजन गर्न खोज्दा २०१२ सालको प्रहरी ऐन बाधक देखाइन्छ, शिक्षा ऐन बनाउन खोज्दा २०२८ सालको ऐन अघि सारिन्छ, अनि वनको अधिकार प्रयोग गर्न खोज्दा २०४९ सालको वन ऐन देखाएर प्रदेशका काम रोकिएका छन्,’ उनले भने । संघ सरकारले कानुन नबनाएको भन्दै प्रदेशलाई पछाडि पारिरहने अवस्था अब स्वीकार्य नहुने पाण्डेले बताए । गण्डकी प्रदेश सरकारले अब आफ्ना कानुन आफैँ बनाउने उनको भनाइ छ ।

‘संघले कानुन नबनाइदिएका कारण हामी धेरै पर्खिन सक्ने अवस्थामा छैनौँ । त्यसैले गण्डकी प्रदेश सरकारले अब आफ्ना कानुन आफैँ बनाउँछ,’ उनले भने, ‘यद्यपि, हामीले बनाएका कतिपय कानुन अहिले अदालत पुगेर रोकिएका पनि छन् ।’