१० राजदूतको बाटो खुल्यो, सुनार अस्वीकृत

काठमाडौं । संसदीय सुनुवाइ समितिले विभिन्न १० देशका लागि प्रस्तावित नेपाली राजदूतको नाम अनुमोदन गरेको छ । साउदी अरबका लागि सिफारिस गरिएका गिरीबहादुर सुनारको नाम भने समितिले अस्वीकार गरेको छ ।

सिंहदरबारमा बसेको समितिको बैठकले प्रस्तावित राजदूतहरूको सुनुवाइ प्रक्रिया पूरा गरेपछि १० जनाको नाम सर्वसम्मतिले अनुमोदन गरेको हो । अनुमोदित नाम अब राष्ट्रपतिबाट नियुक्ति हुने प्रक्रियामा अघि बढ्नेछन् ।

समितिबाट अनुमोदित हुनेमा भारतका लागि डा. निश्चलनाथ पाण्डे, चीनका लागि डा. कल्याणराज शर्मा, अमेरिकाका लागि चीरनजंग थापा र बेलायतका लागि गौरब शमशेर जबरा छन् । त्यस्तै, जर्मनीका लागि सरु जोशी, इजरायलका लागि सुरेशकुमार कर्ण, ओमानका लागि पदमाक्षी राणा, दक्षिण कोरियाका लागि प्रा. डा. संगम श्रेष्ठ, स्पेनका लागि प्राप्ती शेरचन र श्रीलंकाका लागि डा. मञ्चला कुमारी झाको नाम पनि समितिले सर्वसम्मतिले अनुमोदन गरेको छ ।

सुनुवाइका क्रममा प्रस्तावित राजदूतहरूले सम्बन्धित मुलुकसँगको द्विपक्षीय सम्बन्धलाई थप सुदृढ बनाउने, आर्थिक कूटनीतिलाई प्रभावकारी बनाउने तथा श्रम र पर्यटन क्षेत्रको प्रवर्द्धन गर्ने योजनासहित आफ्ना कार्ययोजना प्रस्तुत गरेका थिए । १० जनाको नाम अनुमोदन हुँदा साउदी अरबका लागि प्रस्तावित सुनारको नाम भने समितिबाट स्वीकृत हुन सकेन । उनको नाम सर्वसम्मतिले अस्वीकार गरिएको हो ।

समितिबाट नाम अनुमोदन भएका राजदूतहरूको नियुक्तिका लागि अब प्रक्रिया अघि बढ्नेछ ।