बिमस्टेक बैठकमा गृहमन्त्रीहरुको भेट, नेपाल–भारत सहकार्यमा जोड

काठमाडौं । नेपालका गृहमन्त्री सुदन गुरुङ र भारतका गृहमन्त्री अमित शाहबीच भारतको नयाँ दिल्लीमा भेटवार्ता भएको छ ।

पहिलो बिमस्टेक गृहमन्त्रीस्तरीय बैठकमा सहभागी हुने क्रममा दुई देशका गृहमन्त्रीबीच भेट भएको हो । भेटमा नेपाल र भारतबीचको द्विपक्षीय सम्बन्धलाई थप सुदृढ बनाउने तथा आपसी सहकार्य विस्तार गर्ने विषयमा छलफल भएको छ ।

भारतीय गृहमन्त्री शाहले सामाजिक सञ्जालमार्फत नेपाली समकक्षी गुरुङसँग भेट गर्न पाउँदा खुसी लागेको बताएका छन् । उनले क्षेत्रीय शान्ति, प्रगति र समृद्धिका लागि नेपाल र भारतबीचको घनिष्ठ सम्बन्धलाई थप बलियो बनाउँदै लैजाने विषयमा जोड दिएका छन् ।

बिमस्टेक गृहमन्त्रीस्तरीय बैठकका क्रममा भएको यस भेटलाई दुई देशबीचको सम्बन्ध र सहकार्यका विषयमा विचार आदानप्रदान गर्ने अवसरका रूपमा हेरिएको छ ।