पर्यटक भिसामा मोरङ आएर धर्म प्रचार, २४ कोरियालीलाई तीन वर्ष नेपाल प्रवेशमा रोक

विराटनगर । पर्यटक भिसाको दुरुपयोग गर्दै मोरङमा धार्मिक प्रशिक्षण तथा पास्टर उत्पादनसम्बन्धी गतिविधिमा संलग्न भएको आरोपमा २४ जना दक्षिण कोरियाली नागरिकलाई नेपालबाट निष्कासन गरिएको छ ।

अध्यागमन विभागले उनीहरूको भिसा रद्द गरी जनही ५० हजार रुपैयाँ जरिबाना असुल गर्नुका साथै तीन वर्षसम्म नेपाल प्रवेश गर्न नपाउने निर्णय गरेको हो । मोरङको सुन्दरहरैँचा नगरपालिका–७ मालाती मार्गस्थित ‘नेपाल न्यू कोभेनेन्ट कलेज’मा धार्मिक प्रशिक्षण, गोष्ठी र दीक्षान्त समारोह सञ्चालन भइरहेको सूचनापछि प्रहरीले उनीहरूमाथि निगरानी बढाएको थियो । सोही क्रममा नियन्त्रणमा लिइएका उनीहरूलाई आवश्यक कारबाहीका लागि काठमाडौंस्थित अध्यागमन विभागमा पठाइएको थियो ।

जिल्ला प्रशासन कार्यालय मोरङले असोज २३ गते २४ जना कोरियाली नागरिकलाई अध्यागमन विभागमा उपस्थित गराएको थियो । विभागले गरेको अनुसन्धानका क्रममा उनीहरूको भिसाको अवधि बाँकी रहे पनि पर्यटक भिसामा गर्न नपाइने धार्मिक शिक्षा, प्रचार तथा प्रशिक्षणसम्बन्धी गतिविधिमा संलग्न भएको पाइएपछि भिसा रद्द गरिएको जनाइएको छ ।

अध्यागमन विभागका अनुसार उनीहरूलाई जनही ५० हजार रुपैयाँ जरिबाना गराएर नेपालबाट निष्कासन गरिएको हो । नेपालबाट प्रस्थान गरेको मितिले तीन वर्षसम्म पुनः प्रवेश गर्न नपाउने गरी प्रतिबन्धसमेत लगाइएको छ । निष्कासनमा पर्नेमा दक्षिण कोरियास्थित ‘लभ नेपाल मिसन’का प्रमुख डा. पार्क गुइ ह्वानसहित २४ जना रहेका छन् ।

उक्त समूह असोज २० र २१ गते काठमाडौं हुँदै बुद्ध र यति एयरलाइन्सबाट दुई समूहमा विराटनगर विमानस्थल आएको थियो । पहिलो दिन १६ जना र दोस्रो दिन आठ जना विराटनगर आएको पत्ता लागेको हो । विमानस्थलबाट उनीहरू सिधै सुन्दरहरैँचा–७ स्थित नेपाल न्यू कोभेनेन्ट कलेज पुगेका थिए ।

समूहका छ जना सुन्दरहरैँचा–९ स्थित नेपालरिका होटलमा र बाँकी १८ जना कलेजको छात्रावासमा बसेका थिए । उनीहरूले अक्टोबर १२ सम्म विभिन्न चरणका धार्मिक गोष्ठी, प्रशिक्षण र दीक्षान्त समारोह सञ्चालन गर्ने योजना बनाएको विवरणमा उल्लेख छ । तर, स्थानीय र सुरक्षा निकायको सक्रियतापछि उनीहरूको योजना अघि बढ्न सकेन ।

सुन्दरहरैँचा–७ मा रहेको नेपाल न्यू कोभेनेन्ट कलेज करिब एक बिघा एक कठ्ठा क्षेत्रफलमा फैलिएको छ । दुईतले पक्की भवन र २२ कोठाको संरचना रहेको उक्त संस्थामा ‘बाइबेल एकेडेमी’का नाममा धार्मिक शिक्षासम्बन्धी विभिन्न पाठ्यक्रम सञ्चालन हुँदै आएको बताइएको छ । संस्थामा सर्टिफिकेट अफ थियोलोजी, ब्याचलर्स अफ थियोलोजी र मास्टर्स अफ थियोलोजीलगायतका पाठ्यक्रम पढाइने गरेको विवरणमा उल्लेख छ ।

उक्त कलेजमा ३०० भन्दा बढी विद्यार्थी अध्ययनरत रहेको र तीमध्ये करिब ४५ जना विपन्न परिवारका विद्यार्थीलाई छात्रावासमा राखेर धार्मिक शिक्षा प्रदान गरिँदै आएको छ । संस्थाले सरकारी शैक्षिक निकायबाट आवश्यक अनुमति नलिएको र ‘रत्न बाप्टिस फाउन्डेसन’ नामक सामाजिक तथा धार्मिक गुठीका रूपमा दर्ता भएको पाइएको छ ।

संस्था दक्षिण कोरियास्थित ‘लभ नेपाल मिसन’को आर्थिक सहयोगमा सञ्चालन भइरहेको बताइएको छ । यसको व्यवस्थापनमा सुनसरीको धरानका महेन्द्र गंग सचाइ राई तथा दुहबी–५ का डा. शरद केसीलगायत व्यक्तिहरू संलग्न रहेको विवरणमा उल्लेख छ ।

सुरक्षा निकायको प्रारम्भिक अनुसन्धानले मोरङको उत्तरी क्षेत्रका सुन्दरहरैँचा, लेटाङ र मिक्लाजुङलगायत स्थानमा विदेशी नागरिकको लगानी तथा संलग्नतामा चर्च, संस्था र धार्मिक शिक्षालय सञ्चालन भइरहेको हुन सक्ने देखाएको छ । ती संस्थामार्फत पास्टर उत्पादन गर्ने गतिविधि र सम्भावित सञ्जालबारे समेत अनुसन्धान भइरहेको जनाइएको छ ।

यसअघि २०८० चैत २० गते पनि ३९ जना दक्षिण कोरियाली नागरिक पर्यटक भिसामा नेपाल आएर सोही कलेजको दीक्षान्त समारोहमा सहभागी भएका थिए । त्यसबेला दुई जना कोरियाली नागरिकलाई पठनपाठनका लागि नेपालमै छाडेर बाँकी सदस्य फर्किएको विवरणमा उल्लेख छ ।

नेपालको प्रचलित अध्यागमन कानुनअनुसार विदेशी नागरिकले पर्यटक भिसामा आएर भिसाको उद्देश्यविपरीत गतिविधि गर्न पाउँदैनन् । पछिल्लो घटनाले विदेशी नागरिकको भिसा प्रयोग, धार्मिक संस्थाको सञ्चालन तथा शैक्षिक गतिविधिको वैधानिकतामाथि प्रश्न उठाएको छ । निगरानी र नियमन गर्नुपर्ने अवस्था आएको छ ।

पर्यटक भिसामा मोरङ आएर धार्मिक गतिविधि, दक्षिण कोरियाका २४ नागरिक प्रहरी नियन्त्रणमा (नामावलीसहित)