चुकेको अवस्थामा सभापतिबाट हटाउनुस् : गगन थापा

काठमाडौं । नेपाली कांग्रेसका सभापति गगनकुमार थापाले आफू चुकेको अवस्थामा सभापतिबाट हटाएर अघि बढ्न पार्टीलाई आग्रह गरेका छन् । उनले कुनै पनि व्यक्ति पार्टीभन्दा ठूलो हुन नसक्ने भन्दै व्यक्तिगत कमजोरीको भारी पार्टीले बोक्न नहुने बताएका छन् ।

ललितपुरको सानेपास्थित पार्टी कार्यालयमा शनिबार आयोजित शपथग्रहण समारोहलाई सम्बोधन गर्दै थापाले कांग्रेस लाखौँ नेता तथा कार्यकर्ताको रगत र पसिनाबाट बनेको सार्वजनिक सम्पत्ति भएको बताए । नेतृत्वका गल्तीको जिम्मेवारी सम्बन्धित व्यक्तिले नै लिनुपर्ने उनको भनाइ थियो ।

सभापतिका रूपमा आफ्नो व्यक्तिगत, पारिवारिक र आर्थिक जीवनका हरेक पक्षमा सचेत रहने प्रतिबद्धता जनाउँदै थापाले आफू चुकेको महसुस भए पार्टीले सभापतिबाट अलग गरेर अघि बढ्नुपर्ने बताए ।

दसैँको फूलपातीका दिन हजारौँ युवा त्रिभुवन अन्तर्राष्ट्रिय विमानस्थलबाट विदेशिनु चिन्ताको विषय भएको उल्लेख गर्दै उनले स्वदेशमै युवालाई स्वाभिमानका साथ बाँच्ने वातावरण बनाउन कांग्रेसले इमानदार प्रयास गर्नुपर्ने बताए ।

पार्टीभित्रका असन्तुष्ट पक्षलाई मिलाउने जिम्मेवारी आफूले लिने बताउँदै थापाले नेता तथा कार्यकर्तालाई आम नागरिकका सुखदुःखमा जोडिन र निराशा चिर्दै सकारात्मक ऊर्जा प्रवाह गर्न आग्रह गरे ।