एनपीएलमा चार टोलीको परीक्षा, विराटनगरले चितवन र जनकपुरले कर्णालीको सामना गर्ने

काठमाडौं । नेपाल प्रिमियर लिग (एनपीएल)को दोस्रो दिन आज (मंगलबार) दुई खेल हुँदैछन् । प्रतियोगितामा विराटनगर किङ्ग्सले चितवन राइनोजसँग प्रतिस्पर्धा गर्दा जनकपुर बोल्ट्स र कर्णाली याक्सबीच पनि भिडन्त हुनेछ ।

मंगलबारको पहिलो खेलमा विराटनगर र चितवन आमनेसामने हुनेछन् । दुवै टोलीका लागि प्रतियोगिताको सुरुआत जितबाट गर्ने अवसर हुनेछ । दोस्रो खेलमा जनकपुर र कर्णालीले प्रतिस्पर्धा गर्नेछन् । दुवै खेलले प्रतियोगिताको सुरुआती चरणमा टोलीहरूको लय र तयारीको संकेत दिने छ ।

विराटनगरको नेतृत्व सन्दीप लामिछानेले गरिरहेका छन् । टोलीमा लोकेश बम, बसिर अहमद, प्रतिश जीसी, सुवास भण्डारी, नारायण जोशी, रुपेश सिंह, नरेन साउद र सुजन थपलियालगायत नेपाली खेलाडी छन् । विदेशी खेलाडीका रूपमा आन्द्रे रसेल, एन्जेलो म्याथ्युज, चरिथ असलंका र इमरान शेखलगायत रहेका छन् ।

चितवन राइनोजको कप्तानी कुशल मल्लले सम्हालिरहेका छन् । टोलीमा देव खनाल, अर्जुन साउद, रिजन ढकाल, कमल सिंह ऐरी, रञ्जित कुमार, दीपक बोहरा र विपिन रावललगायत खेलाडी छन् । चितवनले रवि बोपारा, सिकन्दर राजा, कलिम साना, हसन अली र उसामा मीरजस्ता विदेशी खेलाडीको साथ पाएको छ ।

दिनको दोस्रो खेलमा जनकपुर बोल्ट्स र कर्णाली याक्सबीच प्रतिस्पर्धा हुनेछ । जनकपुरको कप्तानी हर्मित सिंहले गरिरहेका छन् । टोलीमा कुशल परेरा, ललित राजवंशी, मयन यादव, अनिल साह, विकास आग्री, आदित्य मेहता, रित गौतम र सन्तोष कार्कीलगायत खेलाडी छन् । विदेशी खेलाडीमा जिमी नीशम, मोइन अली र इफ्तिकार अहमद पनि जनकपुरको टोलीमा समावेश छन् ।

कर्णाली याक्सको नेतृत्व सोमपाल कामीले गरिरहेका छन् । टोलीमा डेभिड मिलर, नन्दन यादव, युवराज खत्री, पवन सर्राफ, विपिनप्रसाद शर्मा, दीपक डुम्रे, युनिश सिंह ठकुरी, शुभ कंसाकार र सूर्य तामाङलगायत खेलाडी छन् । कर्णालीले पनि आफ्नो टोलीको संयोजन र खेलाडीको प्रदर्शनका आधारमा जनकपुरलाई चुनौती दिनेछ ।

सोमबार सुरु भएको प्रतियोगिताको पहिलो खेलमा लुम्बिनी लायन्सले सुदूरपश्चिम रोयल्सलाई सात विकेटले हराएको थियो । पहिलो दिन एक खेल मात्रै भएकोमा दोस्रो दिनबाट खेलतालिकाअनुसार दुई खेल सञ्चालन हुन लागेका हुन् ।

समूह चरणका खेल कात्तिक २९ गतेसम्म चल्नेछन् । त्यसपछि मंसिर १ गते शीर्ष दुई टोलीबीच पहिलो क्वालिफायर हुनेछ । मंसिर २ गते तेस्रो र चौथो स्थानका टोलीले इलिमिनेटर खेल्नेछन् । ३ गते दोस्रो क्वालिफायर हुनेछ भने प्रतियोगिताको फाइनल मंसिर ५ गते हुनेछ ।