त्रित राजको अर्धशतकमा जनकपुरको जित, पोखरा फेरि निराश

काठमाडौं । त्रित राज दासको उत्कृष्ट अर्धशतक प्रेरित जनकपुर बोल्ट्सले नेपाल प्रिमियर लिग (एनपीएल)मा पोखरा एभेन्जर्समाथि रोमाञ्चक जित निकालेको छ ।

आइतबार राति सम्पन्न प्रतिस्पर्धात्मक खेलमा जनकपुरले पोखरालाई ९ रनले हराउँदै प्रतियोगितामा दोस्रो जित दर्ता गरेको हो । पोखराले भने लगातार दोस्रो हार बेहोरेको छ ।

जनकपुरले दिएको १४८ रनको लक्ष्य पछ्याएको पोखरा निर्धारित २० ओभरमा ९ विकेटको क्षतिमा १३८ रनमै रोकियो । पोखराका लागि कप्तान कुशल भुर्तेलले ३५ रन बनाए पनि टोलीलाई जित दिलाउन सकेनन्। विपिन आचार्यले २०, विपिन खत्रीले अविजित १७ तथा किरण ठगुन्नाले १५ रन जोडे ।

पहिले ब्याटिङ गरेको जनकपुरले २० ओभरमा ७ विकेट गुमाएर १४७ रन बनाएको थियो । उसका लागि त्रित राज दासले सर्वाधिक ६१ रनको योगदान दिए । ५५ बलको सामना गरेका उनले ७ चौका र २ छक्का प्रहार गरे ।

मोइन अलीले आक्रामक ब्याटिङ गर्दै १६ बलमा २१ रन बनाए । अभिनाश तिवारी २४ रनमा अविजित रहँदा जेम्मी निसमले ११ रन जोडे ।

पोखराका सकिब अल हसनले ३ विकेट लिए । चमिका करुनारत्नेले २ तथा मेहेदी हसन र मोहम्मद साइफुदीनले समान १ विकेट हात पारे ।

यो जितसँगै जनकपुरले तीन खेलबाट दोस्रो जित निकालेको छ । पोखरा भने पहिलो खेलमा सुदूरपश्चिमसँग ६ विकेटले पराजित भएपछि दोस्रो खेलमा पनि जितविहीन बनेको छ ।