सिद्धार्थ स्कुलमा तिहार विशेष कार्यक्रम, कला र संस्कृतिको संरक्षणमा जोड

विराटनगर । नेपाली कला, संस्कृति, परम्परा र मौलिक संस्कारको संरक्षण तथा नयाँ पुस्तामा हस्तान्तरण गर्ने उद्देश्यले मोरङको सुन्दरहरैँचा नगरपालिका–१० स्थित सिद्धार्थ स्कुलमा तिहार विशेष कार्यक्रम आयोजना गरिएको छ।

विद्यार्थीलाई नेपाली चाडपर्वको सांस्कृतिक महत्त्व, मौलिक पहिचान र पुस्तौँदेखि चलिआएका परम्पराबारे व्यवहारिक रूपमा जानकारी गराउने उद्देश्यले कार्यक्रम आयोजना गरिएको विद्यालयले जनाएको छ।

कार्यक्रममा विद्यार्थीहरूले तिहारसँग सम्बन्धित विभिन्न सांस्कृतिक तथा सिर्जनात्मक प्रस्तुति दिएका थिए। यस्ता गतिविधिले विद्यार्थीलाई आफ्नो कला, संस्कृति र परम्परासँग जोड्नुका साथै मौलिक पहिचानप्रति सम्मान र अपनत्वको भावना विकास गर्न सहयोग पुग्ने विद्यालयको विश्वास छ।

विद्यालयका संस्थापक प्रिन्सिपल अर्जुन बस्नेतले शिक्षालाई किताबी ज्ञानमा मात्र सीमित नराखी व्यवहारिक, नैतिक र सांस्कृतिक पक्षसँग जोड्नुपर्ने बताए। उनले यस्ता कार्यक्रमले विद्यार्थीलाई आफ्नो संस्कृति र परम्पराको महत्त्व बुझ्न तथा त्यसको संरक्षणमा प्रेरित गर्न महत्त्वपूर्ण भूमिका खेल्ने धारणा राखे।

नेपाली कला, संस्कृति र परम्परालाई नयाँ पुस्तामाझ परिचित गराउँदै पुस्तान्तरण गर्नु विद्यालयको समेत दायित्व भएको उल्लेख गर्दै उनले शिक्षण सिकाइसँगै यस्ता सांस्कृतिक गतिविधिलाई निरन्तरता दिइने बताए।