अनियमितताको आरोपमा गण्डकीका खेलकुद परिषद्का सदस्यसचिव शर्मा बर्खास्त

पोखरा । गण्डकी प्रदेश सरकारले प्रदेश खेलकुद परिषद्का सदस्यसचिव श्रीधर शर्मालाई पदबाट बर्खास्त गरेको छ। खेलाडीलाई पदक तथा नगद पुरस्कार वितरणमा अनियमितता गरेको र निर्धारित प्रक्रियाविपरीत काम गरेको आरोपमा छानबिनमा परेका शर्मालाई मन्त्रिपरिषद्को बैठकले हटाउने निर्णय गरेको हो।

सरकारका प्रवक्ता एवं आर्थिक मामिलामन्त्री जीतबहादुर शेरचनले शर्मालाई पदबाट हटाउने निर्णय भएको पुष्टि गरेका छन् । सामाजिक विकास, युवा तथा खेलकुद मन्त्रालयले शुक्रबार परिषद् र सम्बन्धित निकायलाई निर्णय कार्यान्वयनका लागि पत्राचार गरिसकेको छ।

शर्माको स्थानमा अर्को व्यवस्था नभएसम्म मन्त्रालयको खेलकुद महाशाखा प्रमुख उपसचिव दीपेन्द्र परियारलाई सदस्यसचिवको जिम्मेवारी दिइएको छ। परिषद्का अन्य पदाधिकारी तथा सदस्य भने यथावत् रहने मन्त्रालयले जनाएको छ।

परिषद्ले पहिलोपटक आयोजना गरेको खेलकुद पदक तथा नगद पुरस्कार वितरण कार्यक्रममा अनियमितता भएको भन्दै विवाद उत्पन्न भएपछि शर्मामाथि छानबिन गरिएको थियो। गत असार ३० गते राष्ट्रिय वा प्रदेशस्तरको कुनै महत्त्वपूर्ण दिवससमेत नपरेको दिन पदक वितरण गरिएको विषयलाई छानबिनका क्रममा प्रश्न उठाइएको थियो। यसले पदकको गरिमा र महत्त्वमा प्रतिकूल असर परेको भन्दै शर्मासँग स्पष्टीकरणसमेत मागिएको थियो।

त्यस्तै, पदकका लागि आवेदन दिन छुटेका खेलाडीलाई पर्याप्त समय दिएर सूचना प्रकाशन नगरी पुरस्कार वितरण गरिएको छानबिनमा औँल्याइएको थियो। परिषद्को स्वीकृत वार्षिक कार्यक्रममा बढीमा चार जनालाई मात्र वर्ष खेलाडीका रूपमा पदक दिने व्यवस्था भए पनि त्यसविपरीत अन्य खेलाडीलाई समेत प्रोत्साहन रकम वितरण गरिएको पाइएको थियो। यही अनियमितता र प्रक्रियागत त्रुटिलाई आधार बनाएर सरकारले शर्मालाई पदबाट हटाउने निर्णय गरेको हो।