जनकपुरलाई हराउँदै चितवन प्लेअफ नजिक

काठमाडौं । नेपाल प्रिमियर लिग (एनपीएल) मा शुक्रबार भएको कम योगफलको खेलमा चितवन राइनोजले जनकपुर बोल्ट्सलाई चार विकेटले पराजित गरेको छ । जितसँगै चितवनले प्लेअफ सम्भावना बलियो बनाएको छ भने जनकपुर र कर्णाली याक्स प्रतियोगिताबाट बाहिरिएका छन् ।

जनकपुरले दिएको ८९ रनको लक्ष्य चितवनले १७.२ ओभरमा ६ विकेट गुमाएर पूरा गरेको हो । चितवनका लागि डाविड मालानले अविजित ३५ रन बनाए । उनले ३९ बलमा एक छक्का प्रहार गरे । कुशल मल्लले १५, रवि बोपाराले १३ र कमिल मिसाराले १२ रन जोडे ।

सामान्य लक्ष्य पछ्याउने क्रममा चितवनले सुरुवातमै विकेट गुमाएको थियो । ओपनर अर्जुन साउद दोस्रो बलमै खाता नखोली आउट भए । ३७ रन बनाउँदा पाँच विकेट गुमाएको चितवनलाई मालान र कुशल मल्लले ३० रनको साझेदारी गर्दै सम्हालेका थिए ।

जनकपुरका राहुल यादवले तीन विकेट लिए भने ललित राजवंशीले दुई र विशाल सुशलिङले एक विकेट लिए । यसअघि कीर्तिपुरस्थित त्रिवि क्रिकेट मैदानमा टस जितेर पहिले ब्याटिङ गरेको जनकपुरले निर्धारित २० ओभरमा नौ विकेट गुमाएर ८८ रन बनाएको थियो ।

चितवनका स्पिनर रन्जित कुमार र कप्तान सिकन्दर राजाले उत्कृष्ट बलिङ गर्दै जनकपुरको ब्याटिङ लाइनअप ध्वस्त पारे । रन्जितले तीन ओभरमा एक मेडनसहित दुई रन खर्चेर तीन विकेट लिए। सिकन्दरले चार ओभरमा दुई मेडन राख्दै १० रन खर्चेर दुई विकेट लिए ।

जनकपुरका लागि कप्तान हर्मीत सिंहले सर्वाधिक २४ रन बनाए । सातौँ नम्बरमा ब्याटिङ गर्न आएका उनले २४ बलमा दुई चौका र एक छक्का प्रहार गरे । विशाल सुशलिङले १३ बलमा एक चौका र एक छक्कासहित १५ रन जोडे । राहुल यादवले अन्तिम बलमा छक्का प्रहार गर्दै अविजित १० रन बनाए ।

जनकपुरका ओपनर तृतराज दास पाँच रन बनाएर दोस्रो ओभरमा आउट भएपछि टोलीले नियमित अन्तरमा विकेट गुमाएको थियो । पाँचौँ विकेटका लागि विशाल सुशलिङ र आदित्य महताले गरेको १८ रनको साझेदारी नै जनकपुरको सबैभन्दा ठूलो साझेदारी बन्यो । सन्तोष कार्कीले १०, रायन बर्लले छ, आदित्य महताले चार र अभिषेक तिवारीले पनि चार रन बनाए। ह्यारी टेक्टर र जिमी निशम खाता नखोली आउट भए । ललित राजवंशी दुई रनमा अविजित रहे ।

चितवनका लागि कमिल मिसारले दुई विकेट लिए । कमल सिंह ऐरी र रिजन ढकालले पनि एक–एक विकेट लिए । छ खेलमा तीन जित हात पारेको चितवन सात अंकसहित तालिकाको चौथो स्थानमा उक्लिएको छ । लिगको अन्तिम खेलमा चितवनले आइतबार कर्णाली याक्ससँग प्रतिस्पर्धा गर्नेछ । त्यसअघि शनिबार विराटनगर किंग्स लुम्बिनी लायन्ससँग पराजित भए चितवनले अन्तिम खेलअघि नै प्लेअफमा स्थान पक्का गर्नेछ। विराटनगर विजयी भए चितवनले कर्णालीलाई हराउनुपर्नेछ ।

सातवटै खेल खेलेको जनकपुरले दुई जितबाट चार अंक मात्र जोड्यो। एक खेल खेल्न बाँकी कर्णालीको पनि चार अंक छ । अन्तिम खेल जिते पनि कर्णाली शीर्ष चारमा पुग्न नसक्ने भएपछि दुवै टोली प्लेअफ दौडबाट बाहिरिएका छन् ।