
विराटनगर । पार्टीभित्रको डाक्टर शेखर कोइराला समूहलाई बाहिरै राखेर नेपाली कांग्रेसको संस्थापन समूह कोशी प्रदेश सरकारमा सहभागी भएको छ ।
आन्तरिक किचलोका कारण सरकारमा सहभागी हुने निर्णय गरेको डेढ महिनापछि कांग्रेस सरकारमा सहभागी भएको हो । सरकारमा सहभागी हुँदा कांग्रेसले पार्टीभित्रको प्रतिपक्ष डाक्टर शेखर कोइराला समूहलाई बाहिर राखेको छ । यद्यपि, एउटा मन्त्रालय भने कोइराला समूहलाई भाग छुट्याएर राखिएको छ ।
९ वटा मन्त्रालय रहेको कोशीमा कांग्रेस एमालेबीच मुख्यमन्त्री तथा मन्त्रिपरिषद् कार्यालयबाहेक मन्त्रालय आधा–आधा बाँड्ने सहमति भएको थियो । पूर्वसहमति अनुसार कांग्रेसले ४ मन्त्री र २ राज्य मन्त्रीको नाम पठाउन सकेन ।
शुक्रबार ३ मन्त्री र १ राज्यमन्त्रीले जिम्मेवारी सम्हाले । चारै जना संस्थापन समूहका हुन् । डाक्टर शेखर कोइराला समूहका लागि एउटा मन्त्रालय राखेर कांग्रेस सरकारमा सहभागी भएको पार्टीका प्रमुख सचेतक गोपाल तामाङले जानकारी दिए । शेखर समूहले एउटा मन्त्री र एउटा राज्यमन्त्री पाउने छ ।
प्रदेशमा शेखरले २ वटा मन्त्रालय दाबी गरेको थियो । शेखर समूहलाई मिलाउन भन्दै मन्त्रालय फुटाउने तयारी पनि भयो । तर आलोचना हुने भन्दै मुख्यमन्त्री हिक्मतकुमार कार्की तयार भएनन् ।
भागबन्डा गर्दा कांग्रेसले पाएको ४ मध्ये २ मन्त्रालयमा शेखर समूहको दाबी थियो । तर, संस्थापन पक्ष १ मन्त्री र १ राज्यमन्त्री मात्रै दिन तयार भयो । डेढ महिनासम्म दुवै समूह गलेनन् । त्यसपछि संस्थापन समूह सरकारमा जाँदा कोइराला समूह बाहिरै बस्यो ।
‘डेढ महिना पर्खदा उहाँ मान्नु भएन्, नमानेपछि माथिबाटै एउटा मन्त्रालय छाडेर सरकारमा जानु भन्ने कुरा आयो,’ कांग्रेस एक सांसदले भने,‘ यति भएपछि आलोचना पनि टर्ने भयो । शेखर समूह कहिले सरकारमा सहभागी हुन्छभन्ने थाहा भएन ।’ कोशी सरकारमा कांग्रेसको नेतृत्व प्रदेश महामन्त्रीसमेत रहेका भौतिक पूर्वाधार मन्त्री भुपेन्द्र राईले गरेका छन् । उनी कृष्णप्रसाद सिटौला समूहका नेता हुन् ।
सिटौला समूहकै भूमि राजवंशी भौतिक पूर्वाधार राज्यमन्त्री बनेका छन् । खगेनसिह हाङ्गाम उद्योग, कृषि तथा सहकारी मन्त्री र सदानन्द मण्डल पर्यटन, वन, वातावरण मन्त्री बनेका छन् । हाङ्गाम सभापति शेरबहादुर देउवा समूहका हुन् । मण्डल भने संस्थापनभित्रकै ज्ञानेन्द्रबहादुर कार्कीको समूहका हुन् ।
नेपाली कांग्रेस नेकपा (एमाले)बीच असार १७ गते गठबन्धन बनेपछि साउन ११ गते नेकपा (माओवादी केन्द्र)ले कोशी प्रदेश सरकार छाडेको थियो । १२ गते कांग्रेसले ४ वटा मन्त्रालय लिएर सरकारमा जाने सहमति गरेको थियो । तर, आन्तरिक सहमति नजुट्दा कांग्रेस सरकारमा सहभागी नभइकन प्रदेशसभा बैठकमा भने सत्तापक्षमा बसेको थियो ।
मुख्यमन्त्रीसँग अझै २ वटा मन्त्रालय
नयाँ सरकार विस्तार भएपछि कोशी प्रदेश सरकार १० सदस्यीय बनेको छ । ८ मन्त्री र २ राज्यमन्त्री छन् । मुख्यमन्त्री हिक्मतकुमार कार्कीले मुख्यमन्त्री तथा मन्त्रिपरिषद्को कार्यालय र स्वास्थ्य मन्त्रालय सम्हालेका छन् । स्वास्थ्य मन्त्रालय शेखर समूहका लागि राखिएको हो ।
मन्त्रिपरिषद्को दोस्रो वरियतामा रहेका रामबहादुर मगर आर्थिक मामिला तथा योजना मन्त्रालयको जिम्मेवारीमा छन् । शुक्रबार शपथ गरेका भौतिक पूर्वाधारमन्त्री राई तेस्रो वरियतामा छन् । त्यसपछिको वरियतामा सामाजिक विकासमन्त्री पाँचकर्ण राई, खानेपानी सिँचाई तथा उर्जामन्त्री एकराज कार्की, आन्तरिक मामिला तथा कानुनमन्त्री लिलाबल्लभ अधिकारी, उद्योग कृषि तथा सहकारीमन्त्री खगेनसिंह हाङगाम र पर्यटन, वन तथा वातावरण मन्त्री सदानन्द मण्डल छन् ।
राज्यमन्त्रीमध्ये सिर्जना राई मुख्यमन्त्री तथा मन्त्रिपरिषद्को कार्यालय र भूमिप्रसाद राजवंशी भौतिक पूर्वाधार मन्त्रालयको जिम्मेवारीमा छन् । २ दलबीच १३ सदस्यीय मन्त्रीमण्डल बनाउने सहमति छ । अब डाक्टर शेखर कोइराला समूहले मन्त्री र राज्यमन्त्रीको नाम दिएपछि एमालेले १ राज्यमन्त्री थप्नेछ ।

























