
सुनसरी । सुनसरीको धरान उपमहानगरपालिका–१७ मा रोकेर राखेको कारबाट आज (बुधबार) बिहान ठूलो परिमाणमा लागुऔषध गाँजा बरामद भएको छ ।
लागुऔषध ओसारपसार भइरहेको विशेष सूचनाका आधारमा इलाका प्रहरी कार्यालय धरानबाट खटिएको टोलीले धरान–१७ स्थित सर्दु खोलाको पुलनजिकबाट १ सय १ किलोग्राम गाँजा बरमद गरेको हो । रोकेर राखेको बा ९ च १७६८ नम्बरको कारलाई शंका लागेर प्रहरीले बिहान ५ बजेतिर चेकजाँच गरेको थियो ।
चेकजाँचका क्रममा कारभित्र गाँजा फेला परेको प्रहरीले जनाएको छ । गाँजासहित कारलाई प्रहरीले नियन्त्रणमा लिएको छ । तर, गाँजा ओसारपसारमा संलग्नहरु फेला नपरेको जानकारी प्रहरीले दिएको छ ।
कार चालक पनि फरार बनेका छन् । गाँजा कसले ल्याएको हो भनेर खुल्न नसकेको र ओसारपसारमा संलग्नको खोजी भइरहेको प्रहरीले जनाएको छ । कार कसको हो भन्ने खुल्न नसकेको छैन ।

























