
काठमाडौं । नवनियुक्त प्रहरी महानिरीक्षक (आईजीपी) दीपक थापाले सहुलियत कर्जाको रकम बढाएका छन् ।
आईजीपीमा बढुवा भएपछि थापाले सहुलियत कर्जाको रकम बढाउने पहिलो निर्णय लिएका हुन् । यसअघि सहुलियत कर्जा भनेर प्रहरी कर्मचारीले ४ लाख रूपैयाँ पाउँदै आएका थिए । त्यसलाई बढाएर थापाले ५ लाख पुर्याएका हुन् ।
प्रहरी नायव महानिरीक्षक (डीआईजी) भन्दा माथिल्लो दर्जाका प्रहरी अधिकारी रहने पोलिसी कोओर्डिनेशन कमिटी (पीसीसी) बैठक बोलाएर थापाले सहुलियत कर्जाबापतको रकम बढाएका हुन् । विशेष कल्याणकारी कोषअन्तर्गत प्रहरी कर्मचारीले पाउँदै आएको सहुलियत कर्जाको रकम बढाइएको नेपाल प्रहरीका प्रवक्ता डीआईजी दिनेश आचार्यले बताए ।
कर्जा लिन ७ वर्ष प्रहरी सेवामा बिताएको हुनुपर्ने नियम थियो । तर, प्रहरी सेवामा प्रवेश गरेको ५ वर्ष पूरा भएपछि उक्त कर्जा पाइने छ ।
पीसीसी बैठकले प्रहरी कल्याण कोषबाट प्रहरी कर्मचारीहरूलाई प्रदान गर्ने सेवा सुविधामा वृद्धि गर्दै ऋण रकममा ब्याजदर घटाउने सन्दर्भमा आवश्यक अध्ययन गर्नुका साथै प्रहरी कल्याण कोष संचालन कार्यविधि, २०८० को समयानुकुल संशोधन तथा परिमार्जन गर्नको लागि सिफारिस समिति गठन गर्न निर्देशनसमेत दिएको छ ।
किस्ता अवधि ५ वर्षबाट ७ वर्ष पुर्याउने गरी कार्यविधि संशोधन गर्नसमेत बैठकले निर्देशन दिएको आचार्यले बताए । मासिक किस्ता रकम र किस्ता संख्या निर्धारण गरी कार्यविधि संशोधन गर्ने व्यवस्था मिलाउन कल्याण महाशाखालाई पीसीसीले निर्देशन दिएको उनको भनाइ छ ।

























