
काठमाडौं । सर्वोच्च अदालतमा ७ वटै प्रदेशका प्रदेश प्रमुख र मुख्यमन्त्रीविरुद्ध रिट निवेदन दर्ता भएको छ ।प्रदेश प्रमुख र मुख्यमन्त्रीले दोहोरो सुविधा लिएको भन्दै अदालतका निवेदन दर्ता भएको हो ।
आफ्नो कार्यक्षेत्रमा खटिएका प्रदेश प्रमुख र मुख्यमन्त्रीले काठमाडौंमा पनि सुविधा लिएको भन्दै त्यसलाई रोक लगाउनुपर्ने मागसहित अदालतमा अधिवक्ता चन्द्रप्रकाश भुसालले रिट निवेदन दर्ता गराएका छन् ।
उनले ललितपुर भैंसेपाटीमा रहेको आवास र अरु सुविधाबाट उनीहरुलाई बञ्चित गर्नुपर्ने माग गरेका छन् ।
भैंसेपाटीमा ७ वटै प्रदेशका प्रदेश प्रमुख र मुख्यमन्त्रीहरूका लागि निर्माण गरिएको आवासमा ७ वटा भवनमा १४ वटा ब्लक छन् ।
आवास क्षेत्र निर्माण गर्न ८५ करोड रुपैयाँभन्दा बढी खर्च भएको छ । उनीहरु काठमाडौं आउँदा त्यही निवास प्रयोग गर्छन् ।
प्रदेश प्रमुखका लागि आवास बाहेकका सुविधा खर्च प्रति महिना करिब २ / ३ लाखसम्म हुनसक्ने र मुख्यमन्त्रीका लागि आवास बाहेकका सुविधा खर्च प्रति महिना करिब ३ / ४ लाखसम्म हुनसक्ने भन्दै रिट निवेदनमा भुषालले राज्यकोषमा भार पारेकाले उक्त सुविधा खारेज गर्न माग गरेका छन् ।























