
काठमाडौं । आन्दोलन हिंसात्मक बनेपछि फरार रहेका राजवादी आन्दोलनका कमाण्डर दुर्गा प्रसाईंले आइतबार सामाजिक सञ्जाल फेसबुक लाइभमा आएर आफूलाई देख्ने बित्तिकै गोली हान्ने प्रधानमन्त्रीको निर्देशन भएको हुँदा सुरक्षित बसेको बताएका छन् ।
उनले प्रहरीसँग माफी पनि मागेका छन् । शुक्रबारदेखि फरार रहेका उनले प्रहरीसँग माफी मागेका हुन् । तीनकुनेमा शुक्रबार राजावादीले गरेको आन्दोलन हिंसात्मक बनेपछि प्रसाईं फरार बनेका थिए ।
आफू असुरक्षित भएपछि प्रहरीको घेरा तोडेर अघि बढेको उनले बताएका छन् । मञ्चमा आफू नजिकैबाट गोली गएको बताउँदै उनले सुरक्षित हुनका लागि प्रहरीको घेरा तोडेको बताएका हुन् ।
‘स्टेजमा मेरो कानको छेउबाट गोली गयो । मलाई मार्ने रहेछन् भनेर आफैँले ‘ड्राइभ’ गरेर प्रहरीको घेरा तोडेर अघि बढेँ । प्रहरीलाई चोट पुर्याएको मा क्षमा चाहन्छु । म सुरक्षित हुनका लागि प्रहरीको घेरा तोडेको हुँ । प्रहरीलाई चोट पुर्याउने उद्देश्यले होइन,’ उनले भनेका छन् ।

























