
विराटनगर । कोशी प्रदेश सरकारले आगामी वर्ष मनाइने ‘कोशी पर्यटन वर्ष २०८२’को मुख्य नारा, लोगो र मस्कट सार्वजनिक गरेको छ।बुधबार पर्यटन, वन तथा वातावरण मन्त्री सदानन्द मण्डलले मस्कट र लागाे सार्वजनिक गरेका हुन् ।
‘रमणीय कोशी’ मूल नारा र ‘कोशीको गौरव हिमालको सान, पर्यटन वर्षमा सबैलाई सम्मान’ भन्ने नारा तय गरिएको छ ।
पर्यटन वर्षको आयोजनाको औपचारिक उद्घाटन आगामी चैत २७ गते तेह्रथुमको तिनजुरे क्षेत्रबाट प्रधानमन्त्री केपी शर्मा ओलीले गर्नेछन् ।
प्रदेश सरकारले पर्यटन वर्षका लागि चालु आर्थिक वर्षमा १० करोड रुपैयाँ बजेट विनियोजन गरेको छ ।
सार्वजनिक लोगोमा नेपाली राष्ट्रिय झण्डाको आकारभित्र विश्वमा कोशी टप्पुमा मात्र पाइने अर्ना, सगरमाथा, पहाड, तराई, कोशी नदी र प्राकृतिक सम्पदा झल्काउने प्रतीकहरू समावेश गरिएको छ।
मन्त्रालयका सचिव विशाल घिमिरेका अनुसार पर्यटन वर्षको मस्कट कोशी प्रदेशको हिमाली क्षेत्रमा पाइने हाब्रेलाई बनाइएको छ ।
के के हुन्छन् पर्यटन वर्षमा ?
-भारतसँगको चार मुख्य नाकामा पर्यटन सूचना केन्द्र स्थापना
-५०० पर्यटन स्वयंसेवक परिचालन गर्ने ।
– नेपाल तथा भारतीय शहरमा पर्यटकीय क्षेत्रकाे प्रवर्द्धन गर्ने ।
कति छन गन्तब्य ?
प्रमुख पर्यटकीय गन्तव्य : १४ वटा
विकास गर्नुपर्ने नयाँ पर्यटकीय क्षेत्र : १६ वटा
कति छन् होटल ?
तारे स्तरका होटल : १२ वटा
पर्यटनस्तरका होटल: ३६ वटा
होमस्टे : १०५ वटा र अन्य साना पर्याप्त छन् ।

























