प्रतीकात्मक तस्बिरविराटनगर । पाँचथरमा भएको आगलागीमा परी मृत्यु हुनेकाे संख्या २ पुगेकाे छ । बिहीबार छुट्टाछुट्टै स्थानमा भएको आगलागीमा परी २ महिलाको मृत्यु भएको हो । ३ जना घाइते छन् ।
प्रहरीका अनुसार फिदिम– १३ जौवारीस्थित जंगलमा लागेको डढेलोमा परेर गम्भीर घाइते भएकी ४७ वर्षीया उषाकला राई नेम्वाङको शुक्रबार मृत्यु भएको हो ।
नेम्वाङलाई एम्बुलेन्समार्फत काठमाडौँको कीर्तिपुरस्थित बर्न अस्पताल लैजाँदै गर्दा बाटोमा मृत्यु भएको जिल्ला प्रहरी कार्यालय पाँचथरका प्रमुख डीएसपी कौशल बुढाथोकीले जानकारी दिए ।
बिहीबार कुम्मायक गाउँपालिका–३ को निजी वनमा आगलागी हुँदा स्थानीय २२ वर्षीया प्रतिमा सम्बाहाम्फेको मृत्यु भएको थियो ।
कुम्मायक गाउँपालिकाको निजी जंगलमा बिहीबार दिउँसो आगो लागेको थियो । कुम्याक–३ ताम्राखुका अमर थापा र पदम खड्कालगायतको निजी वनमा सल्किएको डढेलोमा घाँस दाउरा गर्न गएकी प्रतिमासहित २८ वर्षीया सपना सम्वाहाम्फे, उनकी छोरी ११ वर्षीया शिवाना सम्वाहाम्फे, ६० वर्षीया निरमाया सम्वाहाम्फे परेका थिए ।
सपना, शिवाना र निरमायाकाे बिपी कोइराला स्वास्थ्य विज्ञान प्रतिष्ठान धरानमा उपचार भइरहेको छ ।

























