
काठमाडौं । उच्च अदालतको बुटवल इजलासको आदेश लगतै राष्ट्रिय स्वतन्त्र पार्टी (रास्वपा)का सभापति रवि लामिछानेलाई प्रहरीले पक्राउ गरेको छ । शुक्रबार साझको आदेश लगतै प्रहरीले लामिछानेलाई घरबाटै पक्राउ गरेको हो ।
बुटवलको सुप्रिम सहकारीको बचत अपचलन मुद्दामा जिल्ला अदालत रुपन्देहीले उनलाई १ करोड धरौटीमा छाडेको थियो ।
शुक्रबार न्यायाधीश रमेश ढकाल र स्वीकृति पराजुलीको संयुक्त इजलासले बुटवलस्थित सुप्रिम सहकारी ठगी सम्बन्धी कसूर र संगठित अपराध सम्बन्धी मुद्दामा जिल्लाको आदेश उल्टाउँदै थुनामा पठाउने आदेश दिएको थियो ।
कास्की, काठमाडौं, रुपन्देही र चितवन जिल्ला अदालतबाट सहकारीको बचत अपचलन मुद्दामा धरौटीमा छुटेका लामिछाने गत चैत १७ गते मात्रै पार्टीको जिम्मेवारीमा फर्किएका थिए । शुक्रबार पक्राउ परेका उनलाई भाेलि रुपन्देही लगिनेछ ।

























