
विराटनगर । मोरङको लेटाङमा मापसे (मादक पदार्थ सेवन) गरेर बाटोमा लडिरहेको अवस्थामा भेटिएका १ जनाको मृत्यु भएको छ ।
लेटाङ नगरपालिका–४ मिलन चोकका ३८ वर्षीय कमल श्रेष्ठ मापसे गरेर बाटोमा लडिरहेको अवस्थामा बिहीबार साँझ फेला परेका थिए । प्रहरीका अनुसार मापसे गरेर उठ्न नसक्ने गरी लडिरहेको अवस्थामा उनलाई लेटाङ–६ मा साथी विकल ओजी मगरले भेटेका हुन् ।
विकलले लडिरहेको ठाउँबाट उठाएर कमललाई स्थानीय टेकबहादुर मगरको घरमा लगेर सुताइदिएका थिए । तर, केही बेरमा टेकबहादुरले उठाउन खोज्दा उनी उठेनन् । आफ्नो घरमा सुतिरहेका कमल नउठेपछि टेकबहादुरले उनको बुवा मणिराम श्रेष्ठलाई फोन गरेर जानकारी गराएका थिए ।
सबै जना भेला भएर कमललाई तत्काल उपचारका लागि विराटनगरको विराट नर्सिङ होम पठाइयो । अस्पताल पुर्याउनसाथ राति ९ः३० बजेतिर चिकित्सकले मृत घोषित गरिदिएको मोरङ प्रहरीका प्रवक्ता डीएसपी वेदप्रकाश जोशीले जानकारी दिए ।
उनका अनुसार अत्यधिक मापसे गरेका कारण कमलको मृत्यु भएको हुनसक्छ । यद्यपि, पोस्टमार्टम रिपोर्ट प्राप्त भएपछि मृत्युको कारण यकिन हुने जोशीले बताए । घटनाको थप अनुसन्धान भइरहेको उनको भनाइ छ ।

























