
विराटनगर । देशका विभिन्न स्थानमा आज (बुधबार) मेघगर्जन र चट्याङसहित हल्का वर्षाको सम्भावना रहेको छ । हिमाली भू–भागमा हिमपातको समेत सम्भावना रहेको छ ।
हाल देशमा पश्चिमी तथा स्थानीय वायु र बंगालको खाडीबाट भित्रीरहेको जलवाष्पयुक्त हावाको प्रभाव कायमै रहेको छ । मौसम पूर्वानुमान महाशाखाका अनुसार बिहान कोशी प्रदेशलगायत देशका पहाडी भू–भागमा आंशिकदेखि साधारणतया बदली रही बाँकी भू–भागमा मौसम मुख्यतया सफादेखि आंशिक बदली रहेको छ ।
कोशी प्रदेशका केही स्थानहरूमा मेघगर्जन र चट्याङसहित हल्का वर्षा भइरहेको छ । देशको पहाडी भू–भागमा दिउँसो आंशिकदेखि साधारणतया बदली रही बाँकी भू–भागमा आंशिक बदली रहने पूर्वानुमान गरिएको छ ।
देशका पहाडी भू–भागका थोरै स्थानहरुमा तथा बाँकी भू–भागका १–२ स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको महाशाखाले जनाएको छ । महाशाखाका अनुसार कोशी, बागमती, गण्डकी र कर्णाली प्रदेशका हिमाली भू–भागका थोरै स्थानहरुमा हल्का वर्षा र हिमपातको सम्भावना छ ।
लुम्बिनी प्रदेशका तराईका थोरै स्थानहरूमा हावाहुरीको समेत सम्भावना छ । देशमा राति आंशिकदेखि साधारणतया बदली रहनेछ ।
कोशी, बागमती र गण्डकी प्रदेशको पहाडी भू–भागका थोरै स्थानहरुमा तथा लुम्बिनी, कर्णाली र सुदूरपश्चिम प्रदेशको १–२ स्थानमा मेघगर्जन र चट्याङसहित हल्कादेखि मध्यम वर्षा हुनसक्ने पूर्वानुमान गरिएको छ । कोशी, बागमती र गण्डकी प्रदेशको हिमाली भू–भागका केही स्थानमा हल्का वर्षा र हिमपातको सम्भावना रहेको छ ।
कोशी र गण्डकी प्रदेश लगायत देशका पहाडी भू–भागका थोरै स्थानहरुमा तथा बाँकी भू–भागका १–२ स्थानमा हावाहुरीको समेत सम्भावना छ । लुम्बिनी प्रदेशको तराईका थोरै स्थानहरूमा हावाहुरीको पूर्वानुमान गरिएको छ ।
मौसममा आउने परिवर्तनका कारण दैनिक जनजीवन, कृषि, स्वास्थ्य, सडक तथा हवाई यातायातमा प्रभाव पर्न सक्ने महाशाखाले जनाएको छ ।

























