फाइल फाेटाेविराटनगर । उदयपुरको चौदण्डीगढी नगरपालिका –९ हडियाको एउटा घरमा आगलागी हुँदा जलेर नष्ट भएको छ ।
चौदण्डीगढी –९ हडियास्थित मुसहरनियामा मोहन र सोवित खत्री (दाजुभाइ)को घर जलेर नष्ट भएको प्रहरीले जनाएको छ । दुवै दाजुभाइ एउटै घरमा बस्दै आएका थिए ।
मंगलबार राति सोवितको भान्सा घरको विद्युत् सर्ट भइ गए आगलागी भएको प्रहरीले जनाएको छ ।
आगोले खत्रीको काठबाट बनेको टिनको छाना भएको २ तले घर जलेर नष्ट भएको हो । आगलागीबाट घरभित्र रहेका सम्पूर्ण अन्नपात, भाँडाकुँडा, लत्ता कपडा, सुनचाँदी, नगद, फर्निचरलगायत सबै जलेर नष्ट भएको प्रहरीले जनाएको छ ।
आगो लागेको जानकारी प्राप्त भए पनि समयमा दमकल पठाउन नसकिएको प्रहरीले जनाएको छ । नगर मुकाम बेलटार र सदरमुकाम गाईघाटबाट दमकल लान त्रियुगा खोलाले अवरोध गर्दा आगोको क्षति कम गर्न नसकिएको हो ।
वर्षाले बेलटार –हडिया खण्डमा पर्ने त्रियुगा नदीमा सञ्चालन गरिएको अस्थायी सडकको ह्युम पाइप बगाएर आउजाउ अवरुद्ध भएका कारण दमकल समयमा पुग्न नपाउँदा क्षति धेरै भएको बताइएको छ ।
घर जलेपछि २ परिवारका १० जना छिमेकीको घरमा शरण लिएर बसेको प्रहरीले जनाएको छ ।























