
विराटनगर । आर्थिक वर्ष २०८२/ ८३ का लागि संघीय सरकारले ल्याएको नीति तथा कार्यक्रम दुवै सदनबाट पारित भएको छ ।
आइतबार प्रतिनिधिसभा र राष्ट्रिय सभाको बैठकले आगामी आर्थिक वर्ष २०८२/ ८३ को नीति तथा कार्यक्रम बहुमतले पारित गरेको हो ।
गत १९ वैशाखमा बसेको संघीय संसद्को संयुक्त बैठकमा राष्ट्रपति रामचन्द्र पौडेलले सरकारको वार्षिक नीति तथा कार्यक्रम प्रस्तुत गरेका थिए ।
त्यसमाथि प्रतिनिधिसभामा २२ वैशाखदेखि सुरु भएको छलफल शुक्रबार सकिएको थियो ।
छलफलको क्रममा सांसदहरूले उठाएका प्रश्नहरूमाथि आइतबारको बैठकमा प्रधानमन्त्री केपी शर्मा ओलीले जवाफ दिएका थिए । जवाफपछि नीति तथा कार्यक्रम पारित भएको थियो । आजै बसेको राष्ट्रियसभाको बैठकले पनि बहुमतका आधारमा नीति तथा कार्यक्रम पारित गरेको छ ।

























