
काठमाडौं । सघन सहरी तथा भवन निर्माण आयोजनाका इन्जिनियर सन्तोषकुमार यादवलाई घुसबापत लिएको रकमसहित अख्तियार दुरुपयोग अनुसन्धान आयोगको टोलीले पक्राउ गरेको छ ।
महोत्तरीको भंगहा नगरपालिका–२ घर भइ भक्तपुरको मध्यपुर ठिमी नगरपालिका–१ लोकन्थली बस्दै आएका यादव ५ लाख ७० हजार घुससहित अख्तियारको फन्दामा परेका हुन् । मध्यपुर ठिमी–१ स्थित एउटा रेस्टुरेन्टबाट उनी बिहीबार पक्राउ परेको अख्तियारले जनाएको छ ।
उनलाई अख्तियार दुरुपयोग अनुसन्धान आयोग, टंगालबाट खटिएको टोलीले पक्राउ गरेको हो । खोटाङमा निर्माणाधीन सडकको रनिङ बिल भुक्तानीमा विभिन्न बहाना बनाएर दुःख दिने गरेको सूचनाका आधारमा उनलाई पक्राउ गर्न अख्तियारको टोली गएको थियो ।

























