
काठमाडौं । सञ्चार तथा सूचना प्रविधिमन्त्री एवं सरकारका प्रवक्ता पृथ्वीसुब्बा गुरुङले राजावादीहरूको आन्दोलनलाई प्रतिबन्ध लगाउने अधिकार सरकारलाई रहेको बताएका छन् ।
सिंहदरबारमा मन्त्रिपरिषद् बैठकका निर्णय सुनाउने क्रममा आज (बिहीबार) सञ्चारकर्मीहरूको प्रश्नको जवाफ दिँदै उनले राजतन्त्र पुनःस्थापना गर्ने कुरा संविधान विरोधी काम भएको उल्लेख गरे ।
अहिलेसम्म सरकारले उदारतापूर्वक संविधानको विरोध, थापित लोकतन्त्रको मूल्य मान्यताको विरोध गर्ने र वर्तमान शासन प्रणाली उल्ट्याउन चाहनेहरूलाई पनि सभा, आन्दोलनका कार्यक्रम गर्न दिइरहेको मन्त्री गुरुङले बताए ।
आन्दोलन गर्न दिने कुरा सरकारको कायरता नभई उदारता भएको र कमजोरी नठान्न चेतावनी दिए । संविधान, जनता विरोधी गतिविधि गरिराख्नेलाई सधैं छुट दिन नसकिने उनको भनाइ थियो ।
मन्त्री गुरुङले राजावादीहरूको आन्दोलनको गतिविधिले कस्तो रूप लिन्छ, त्यहीअनुसार सरकार अघि बढ्ने उल्लेख गरे ।

























