
चुहिने घरको छानो टाल्न छोरा परदेशियो
बिहान बेलुका पेट पाल्न छोरा परदेशियो
आमाको बुलाकी साहुको पोल्टामा राखेर
चिसो चुल्होमा आगो बाल्न छोरा परदेशियो ।
बाको फाटेको दौरा फुटेको पैताला सम्झेर
असह्य गरिबीको पीडा फाल्न छोरा परदेशियो ।
दुधे बालक र श्रीमतिको लाज ढाक्नलाई
गह्रुङ्गो जिम्मेवारी समाल्न छोरा परदेशियो ।
अधियाँ खेतमा सुन फलाउन तम्सेको जवानी
बालुवामा पसिना हाल्न छोरा परदेशियो ।
-प्रशान्त निराैला, विराटनगर- ५



















