दुवै सदनको बैठक बस्दै, प्रतिनिधिसभामा प्रतिपक्षीले अवरोध गर्ने

Share this
700shares
मुलुकी खबर
मुलुकी खबर
clock२०८२ जेठ १४, बुधबार ०६:४६

काठमाडौं । संघीय संसदका दुवै सदनको बैठक आज हुँदैछ । प्रतिनिधिसभाको बैठक बिहान ११ बजे र राष्ट्रियसभाको बैठक दिउँसो १स्१५ बजे बस्ने तय भएको छ ।

मंगलबार प्रतिपक्षी दलको विरोधले प्रतिनिधिसभाको बैठक कार्यसूचीमा प्रवेश नगरी स्थगित भएको थियो । आज पनि प्रतिपक्षीले अवरोधको तयारी गरेका छन् । प्रतिपक्षी दलले भिजिट भिसा प्रकरणमा मुछिएका गृहमन्त्री रमेश लेखकको राजीनामालाई बटमलाइनको रुपमा प्रस्तुत गरेका छन् ।

आजको बैठकका लागि संसद सचिवालयले सम्भावित कार्यसूची तय गरेको छ। प्रतिनिधिसभामा राज्य व्यवस्था तथा सुशासन समितिका सभापति रामहरि खतिवडाले ‘सङ्घीय निजामति सेवा विधेयकसम्बन्धी समितिको प्रतिवेदन, २०८०’ पेश गर्नेछन् ।

उपप्रधानमन्त्री तथा अर्थमन्त्री विष्णुप्रसाद पौडेलले आर्थिक वर्ष २०८१–८२ को आर्थिक सर्वेक्षण पेश गर्नेछन् । भूमिसम्बन्धी केही नेपाल ऐन संशोधन गर्ने विधेयक, २०८२ माथि दफावार छलफल गरी आजै पारित गर्ने प्रस्ताव पनि कार्यसूचीमा छ।

प्रतिनिधिसभामा कृषि, सहकारी तथा प्राकृतिक स्रोत समितिका सभापति कुसुमदेवी थापाले ‘कृषि सहकारी तथा प्राकृतिक स्रोत समितिको वार्षिक प्रतिवेदन, २०८२’ पेश गर्नेछन्। युवा तथा खेलकुद मन्त्रालय र स्वास्थ्य तथा जनसंख्या मन्त्रालयसँग सम्बन्धित मौखिक प्रश्नको सम्बन्धित मन्त्रीले जवाफ दिनेछन्।

राष्ट्रियसभामा पनि उपप्रधानमन्त्री तथा अर्थमन्त्री विष्णुप्रसाद पौडेलले आर्थिक वर्ष २०८१–८२ को आर्थिक सर्वेक्षण पेश गर्नेछन् । कानुन, न्याय तथा संसदीय मामिलामन्त्री अजयकुमार चौरसियाले प्रतिनिधिसभाबाट सन्देशसहित प्राप्त ‘केही नेपाल ऐन संशोधन गर्ने विधेयक, २०८० लाई दफावार छलफलका लागि विधायन व्यवस्थापन समितिमा पठाइयोस्’ भन्ने प्रस्ताव राख्नेछन्।

राष्ट्रियसभामा शहरी विकास, भूमि व्यवस्था, सहकारी तथा गरिबी निवारण, स्वास्थ्य तथा जनसंख्या र वन तथा वातावरण मन्त्रालयसँग सम्बन्धित मौखिक प्रश्नको सम्बन्धित मन्त्रीले जवाफ दिनेछन्।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.