
काठमाडौं । गृहमन्त्री रमेश लेखकको राजीनामा माग गरिरहेको राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)ले प्रतिनिधिसभा बैठक बहिष्कार गरेका छन् । बुधबार प्रतिनिधिसभा बैठक सुरु हुने बित्तिकै दुवै पार्टीका सांसदहरूले बैठक अवरोध गरे ।
त्यसपछि सभामुख देवराज घिमिरेले रास्वपाका सांसद विन्दवासिनी कंसाकारलाई बोल्न दिएका थिए । उनले भिजिट भिसा प्रकरणको छानबिन गर्न सरकारसँग माग गरिन् । उनले भिजिट भिसाको नाममा मानव तस्करी जारी रहेको भन्दै सरकारले नदेखेको बताइन् । उनले सरकारमा रहेका मन्त्रीका ३२ लाख अडियो बाहिर आउँदा पनि सरकारले नदेखेको आरोप लगाइन् ।
त्यसपछि बोलेका राप्रपाका सांसद राजेन्द्र लिङ्देनले मन्त्रीहरूमा कसले बढी कमाउने, कसले बढी भ्रष्टाचार गर्ने भन्नेमा प्रतिस्पर्धा चलिरहेको बताए । उनले अडियो बाहिर आएका मन्त्रीहरूमाथि छानबिन हुनुपर्ने बताए । त्यसपछि रास्वपा र राप्रपाका सांसदले संसद् बहिष्कार गर्दै बाहिरिएका छन् ।
























