समुदायस्तरमै फैलियो हैजा : संक्रमितको संख्या ७९ पुग्यो

पर्सा । वीरगञ्ज महानगरपालिका क्षेत्रमा हैजा (कोलेरा) समुदायस्तरमै फैलिएको पुष्टि भएको छ । तर, यसको वास्तविक स्रोत भने अझै पत्ता लाग्न सकेको छैन । गत शुक्रबारदेखि विभिन्न वडामा लगातार नयाँ संक्रमित भेटिइरहेका छन् ।

स्वास्थ्य कार्यालय पर्साका जनस्वास्थ्य अधिकृत जयमोद ठाकुरका अनुसार हालसम्म संक्रमितको संख्या ७९ पुगिसकेको छ । सोमबार थप ८ जना नयाँ संक्रमित थपिएको उनले बताए ।

Advertisement

अहिले विभिन्न अस्पतालमा १ सय ३ जना बिरामीको उपचार भइरहेको छ । ठाकुरका अनुसार वीरगञ्जको पानीका नमुना संकलन गरेर परीक्षणका लागि पठाइएको छ । सोमबारभित्रै प्रारम्भिक रिपोर्ट आउने र सम्भावित स्रोतको पहिचान हुने अपेक्षा गरिएको उनले बताए ।

नारायणी अस्पताल वीरगञ्जका प्रवक्ता डा. उदयनारायण सिंहका अनुसार हैजाका बिरामी मात्रै नभई अन्य बिरामीको चापका कारण अस्पतालको क्षमता नाघिसकेको छ । उनले भने, ‘हामीसँग बेड र जनशक्ति दुवै अभाव छ । अस्पतालमा हैजाका ३० जना बिरामी भर्ना भएका छन् ।’

पर्याप्त जनशक्ति र साधनस्रोत नहुँदा व्यवस्थापन गर्न गाह्रो भइरहेको उनले बताए । यसरी समुदायमै हैजाको संक्रमण फैलँदा स्थानीय त्रसित बनेका छन् । अस्पतालहरू बिरामीले भरिएका छन् । स्रोत नखुलेसम्म संक्रमण नियन्त्रणमा समस्या हुने चिकित्सकहरूको भनाइ छ ।