बम विस्फोट आरोपमा पक्राउ परेपछि श्रम संस्कृति पार्टीका उपाध्यक्ष निलम्बित

Share this
716shares
मुलुकी खबर
मुलुकी खबर
clock२०८२ पुस २, बुधबार १३:१९

धरान । श्रम संस्कृति पार्टीका अध्यक्ष एवं धरान उपमहानगरपालिकाका मेयर हर्क साम्पाङले आफ्नै पार्टीका उपाध्यक्ष देवराज लामालाई पदबाट निलम्बन गरेका छन् । बम विस्फोटको पुरानो घटनामा संलग्न रहेको आरोपमा प्रहरीले लामालाई पक्राउ गरेपछि साम्पाङले नैतिकताको आधारमा उनलाई निलम्बन गरेको घोषणा गरेका हुन् ।

बुधबार भिडियो सन्देश जारी गर्दै साम्पाङले अनुसन्धान नटुंगिएसम्मका लागि लामालाई जिम्मेवारीबाट मुक्त गरिएको जानकारी दिए । ‘गलतलाई गलत भन्छु, राज्यलाई सघाउँछु’ मेयर साम्पाङले राज्यको अनुसन्धान प्रक्रियालाई सघाउने प्रतिबद्धता जनाउँदै आफू सधैं विधिको शासनको पक्षमा रहेको बताएका छन् ।

“म गलतलाई गलत नै भन्ने मान्छे हो। यदि उहाँ दोषी हुनुहुन्छ भने कानुन बमोजिम कारबाही हुनैपर्छ, यसमा हाम्रो दबाब रहँदैन,” साम्पाङले स्पष्ट पारे, “तर यदि निर्दोष हुनुहुन्छ भने उहाँलाई दुःख दिन पाइँदैन ।” उनका अनुसार लामा निर्दोष साबित भएमा पार्टीमा पुनः स्वागत गरिनेछ भने दोषी ठहर भएमा पूर्ण रूपमा निष्कासन गरिनेछ ।

उपाध्यक्ष लामा पूर्व माओवादी कार्यकर्ता रहेको र विगतमा जेल जीवन समेत भुक्तान गरिसकेको चर्चा भइरहँदा साम्पाङले भने पक्राउको ‘टाइमिङ’ प्रति प्रश्न उठाएका छन्। दशकौँ पुरानो घटनालाई लिएर अहिले पक्राउ गरिनुमा राजनीतिक षड्यन्त्र लुकेको उनको दाबी छ । “२०७९ को चुनावमा भाग लिँदा केही भएन, तर अहिले श्रम संस्कृति पार्टीको क्रेज बढेपछि पुरानो कुरा उक्काएर पक्राउ गर्नु राजनीतिक प्रतिशोध हो,” साम्पाङले भने। उनले यस्ता षड्यन्त्रबाट आफूहरू विचलित नहुने समेत बताए ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.