
काठमाडौँ । नेपाली कम्युनिस्ट पार्टीका सह-संयोजक माधव नेपालले आगामी निर्वाचनमा आफ्नो पार्टीलाई बहुमत दिएर जिताउन जनतासँग अपिल गरेका छन् । शनिबार पार्टीको ‘एकता सन्देश सभा’ लाई सम्बोधन गर्दै उनले जनताले दिएको जिम्मेवारी आफूहरूका लागि महत्त्वपूर्ण अग्निपरीक्षा हुने बताए ।
जेनजी र सुशासनको मुद्दा पछिल्लो समय युवा पुस्ताले अघि सारेका सुशासन र भ्रष्टाचार अन्त्यका नाराहरूलाई आफ्नो पार्टीले पूर्ण साथ दिएको नेपालले उल्लेख गरे । सामाजिक सञ्जालमा प्रतिबन्ध लगाउने र नागरिक अधिकार कटौती गर्ने जस्ता निरङ्कुश कदमका विरुद्ध आफूहरू सधैँ लडिरहेको उनले दाबी गरे । युवाहरूको माग जायज भएकै कारण नयाँ पुस्ताका हजारौँ साथीहरू आफ्नो पार्टीमा आबद्ध भइरहेको उनको भनाइ छ ।
अग्निपरीक्षा र प्रतिबद्धता आजसम्म देशभक्ति र जनसेवाको भावनालाई केन्द्रमा राखेर राजनीति गर्दै आएको दाबी गर्दै नेपालले अबको पालो आफ्नो पार्टीलाई एक पटक मौका दिनुपर्नेमा जोड दिए । उनले भने, ‘हामीले सुशासनको पक्षमा आवाज बुलन्द गर्दै सरकारलाई पटक-पटक मागपत्र बुझाएका छौँ र जनताको माझमा गएर सङ्घर्ष गरेका छौँ।’
युवाहरूको विश्वासलाई मर्न नदिने प्रतिबद्धता जनाउँदै नेपालले पार्टी प्रवेश गर्ने नयाँ पुस्तालाई बधाई दिए । समय अभावका कारण धेरै व्यक्तिहरूसँग छलफल गर्न नपाए पनि आगामी दिनमा युवाहरूसँगको संवादलाई अझ व्यापक बनाउने उनको योजना छ । इमानदारिताको राजनीति र जनताको चाहना साकार पार्न आफ्नो पार्टी दृढ सङ्कल्पका साथ अगाडि बढेको भन्दै उनले सबैलाई एकताको अभियानमा जोडिन आग्रह गरे ।
























