
काठमाडौं । लामो समयदेखि अन्योल र तनावले गाँजिएको राजनीतिक वातावरणलाई निकास दिने मुख्य विकल्पका रूपमा प्रतिनिधिसभा निर्वाचनलाई अघि सार्दै शीर्ष राजनीतिक नेतृत्वले त्यसलाई सफल बनाउने साझा प्रतिबद्धता जनाएको छ ।
राष्ट्रपति भवन शीतलनिवासमा मंगलबार भएको उच्चस्तरीय छलफलबाट फागुन २१ गते तय गरिएको निर्वाचनलाई सम्पन्न गर्न आवश्यक वातावरण बनाउने समझदारी बनेको हो । शीतलनिवासमा भएको छलफलमा राष्ट्रपति रामचन्द्र पौडेल, प्रधानमन्त्री सुशीला कार्की, पूर्वप्रधानमन्त्री एवं नेपाली कांग्रेसका सभापति शेरबहादुर देउवा, पूर्वप्रधानमन्त्री एवं नेकपा (एमाले)का अध्यक्ष केपी शर्मा ओली तथा पूर्वप्रधानमन्त्री एवं नेपाली कम्युनिष्ट पार्टी (नेकपा)का संयोजक पुष्पकमल दाहाल ‘प्रचण्ड’ सहभागी थिए ।
छलफलको केन्द्रमा मुलुकको वर्तमान गम्भीर राजनीतिक अवस्था, त्यसबाट उत्पन्न संवेदनशीलता र त्यसको समाधानका रूपमा निर्वाचनलाई कसरी विश्वसनीय र सफल बनाउने भन्ने विषय रहेको थियो । राष्ट्रपतिका प्रेस सल्लाहकार किरण पोखरेलका अनुसार छलफलमा सहभागी नेताहरूबीच निर्वाचन सफल बनाउन आपसी सहकार्य र जिम्मेवारीका साथ अघि बढ्ने सहमति बनेको छ ।
औपचारिक सहमतिमा सीमित नरही त्यसलाई व्यवहारमा उतार्न थप र विस्तृत छलफल बालुवाटारमा गर्ने समझदारीसमेत भएको छ । आगामी दिनमा हुने छलफलमा निर्वाचनको वातावरण कसरी सहज बनाउने, राजनीतिक तनाव कसरी कम गर्ने र सबै पक्षलाई सहभागी गराउने उपायहरूमा केन्द्रित हुने बताइएको छ ।
छलफलका क्रममा राष्ट्रपति पौडेलले देशको परिस्थिति गम्भीर र संवेदनशील मोडमा रहेको उल्लेख गर्दै त्यसबाट बाहिर निस्कन निर्वाचन नै सबैभन्दा उपयुक्त र लोकतान्त्रिक उपाय भएको स्पष्ट पारेका थिए । ‘देशको वर्तमान अवस्थालाई ध्यानमा राखेर निर्वाचनको घोषणा गरिएको हो । यस्तो अवस्थामा निर्वाचन सफल बनाउने दायित्व हामी सबैको साझा दायित्व हो,’ राष्ट्रपतिको भनाइ उद्धृत गर्दै पोखरेलले जानकारी दिए ।
राष्ट्रपतिले विशेष रूपमा प्रधानमन्त्री र प्रमुख तीन राजनीतिक दलका शीर्ष नेताहरूलाई फागुन २१ गतेका लागि तय भएको प्रतिनिधिसभा निर्वाचनलाई सफल बनाउन जिम्मेवार भूमिका खेल्न आग्रह गरेका थिए । निर्वाचन मुलुकलाई राजनीतिक स्थिरतामा लैजाने प्रवेशद्वार भएकाले त्यसप्रति गम्भीर हुनुपर्नेमा उनको जोड थियो ।
शीतलनिवासको भेटघाटलाई पछिल्लो समय देखिएको राजनीतिक ध्रुवीकरण र अविश्वासको माहोलमा आएको महत्त्वपूर्ण संकेतका रूपमा हेरिएको छ । निर्वाचनको मिति नजिकिँदै जाँदा विभिन्न राजनीतिक दल र समूहबीच असहमति, आन्दोलन र आशंका देखिँदै आएका बेला राष्ट्रपतिको सक्रिय पहलले संवादको ढोका खुला रहेको सन्देश दिएको छ ।
























