
काठमाडौं । प्रतिनिधिसभा सदस्य निर्वाचनअन्तर्गत समानुपातिक निर्वाचन प्रणालीका उम्मेदवारहरूको बन्दसूची बुझाउने प्रक्रिया आइतबार (आज)देखि सुरु हुँदैछ ।
आगामी फागुन २१ गते हुने प्रतिनिधिसभा निर्वाचनका लागि निर्वाचन आयोगले बन्दसूची बुझाउन आइतबार र सोमबार २ दिनको समय तोकेको छ । राजनीतिक दलहरूले आफ्नो बन्दसूची निर्वाचन आयोगको केन्द्रीय कार्यालयमा स्थापना गरिएको निर्वाचन अधिकृतको कार्यालयमा अपराह्न ४ बजेसम्म बुझाउनुपर्नेछ ।
निर्वाचन आयोगका प्रवक्ता नारायणप्रसाद भट्टराईका अनुसार बन्दसूची विधि, प्रक्रिया र कानुनले तोकेका सबै मापदण्ड पूरा गरेर पेस गर्नुपर्नेछ । समानुपातिक निर्वाचन प्रणालीतर्फ प्रतिनिधिसभामा १ सय १० सिट रहेका छन् ।
यही सिटका लागि उम्मेदवारहरूको प्राथमिकता क्रमसहित बन्दसूची पेस गर्नुपर्ने व्यवस्था छ । आयोगका अनुसार समानुपातिक निर्वाचनमा सहभागी हुन निवेदन दिएका दलहरूमध्ये १ सय दललाई निर्वाचनमा सहभागी हुन स्वीकृति दिइएको छ । जबकि आयोगमा हाल १ सय ३७ दल दर्ता छन् ।
संविधान तथा प्रतिनिधिसभा सदस्य निर्वाचन ऐन, २०७४ अनुसार राजनीतिक दलहरूले बन्दसूची तयार गर्दा भूगोल र प्रादेशिक सन्तुलनका साथै दलित, आदिवासी जनजाति, खसआर्य, मधेसी, थारू, मुस्लिमलगायत समुदायको समानुपातिक प्रतिनिधित्व सुनिश्चित गर्नुपर्नेछ । आयोगले दलहरूलाई बन्दसूची सार्वजनिक गर्नसमेत आग्रह गरेको छ । आयोगका अनुसार यस प्रक्रियाले दलहरूको पारदर्शिता र समावेशी प्रतिबद्धताको स्पष्ट तस्बिर प्रस्तुत गर्नेछ ।
























